වික්ටෝරියාහි වායු දූෂණය අවම කිරීම සඳහා නිවාසවල භාවිත කරන දැව උදුන් ක්‍රමයෙන් ඉවත් කිරීමට රජය පියවර ගත යුතු බව පිරිසිදු වාතය වෙනුවෙන් පෙනී සිටින කණ්ඩායම් ඉල්ලා තිබෙනවා.

වික්ටෝරියා රජය 2027 ජනවාරි සිට අලුතින් ඉදිකරන නිවාස සහ වාණිජ ගොඩනැගිලි සඳහා ගෑස් භාවිතයෙන් ඉවත් වන නව විදුලි නීති හඳුන්වාදීමට සූදානම් වන නමුත්, එම වෙනසට දැව උදුන් ඇතුළත් කර නොමැති බව ඔවුන් පෙන්වා දෙනවා.

2021 වසරේ වික්ටෝරියා පාර්ලිමේන්තු විමර්ශනයකදී දැව උදුන්වලින් ඇතිවන දුම්වල සෞඛ්‍ය බලපෑම් පිළිබඳව අවධානය යොමු කරමින්, නාගරික සහ ජනාකීර්ණ ප්‍රදේශවල දැව උදුන් ක්‍රමයෙන් ඉවත් කිරීමට සහ ඒ සඳහා සහන වැඩසටහනක් සලකා බලන ලෙස නිර්දේශ කර තිබුණා.

නමුත් එම විමර්ශනයට රජයේ ප්‍රතිචාරය ඉදිරිපත් කර තිබුණේ මේ වසරේ ජූනි මාසයේදී වන අතර, එහි නව ක්‍රියාමාර්ග ප්‍රමාණවත් නොවන බව පරිසර කණ්ඩායම් චෝදනා කරනවා.

වික්ටෝරියා පුරා දැව උදුන් 240,000ක් පමණ භාවිත වන අතර, ඒවායින් නිකුත් වන දුම වායු ගුණාත්මකභාවයට සහ ජනතාවගේ සෞඛ්‍යයට බලපෑම් කළ හැකි බව රජයේම වාර්තා පෙන්වා දෙනවා.

විශේෂයෙන් දැව දුමෙන් නිකුත් වන සියුම් අංශු පෙනහළු තුළට ගැඹුරින් ඇතුළු විය හැකි අතර, ඇදුම සහ අනෙකුත් හෘද හා පෙනහළු ආශ්‍රිත තත්ත්ව ඇති පුද්ගලයන්ට වැඩි බලපෑමක් ඇති කළ හැකි බව වික්ටෝරියා රජයද සඳහන් කරනවා.

කෙසේ වෙතත්, දැව උදුන් වික්ටෝරියාහි විශේෂයෙන් ප්‍රාදේශීය ප්‍රජාවන්ට වැදගත් උණුසුම් කිරීමේ ක්‍රමයක් බව පවසන රජය, දැනට අලෙවි කරන දැව උදුන් වඩාත් පිරිසිදු සහ කාර්යක්ෂම වන ලෙස ප්‍රමිතීන් පනවා ඇති බව අවධාරණය කරනවා.