වික්ටෝරියා ප්‍රාන්තයේ අත්‍යවශ්‍ය ආහාර ද්‍රව්‍යවල මිල සියයට 30කින් අඩු කිරීමේ අරමුණින් රජයට අයත් සුපිරි වෙළෙඳසල් 10ක් ආරම්භ කිරීමට Greens පක්ෂය නව මැතිවරණ යෝජනාවක් ඉදිරිපත් කර තිබෙනවා.

නොවැම්බර් 28 පැවැත්වෙන ප්‍රාන්ත මැතිවරණය ඉලක්ක කරමින් ඉදිරිපත් කර ඇති මෙම සැලැස්ම සඳහා ඩොලර් මිලියන 350ක් වෙන් කිරීමටයි යෝජනා කර ඇත්තේ.

Coles සහ Woolworths වැනි ප්‍රධාන වෙළෙඳසල්වලට සාපේක්ෂව කිරි, පාන්, බිත්තර, මස්, පලතුරු සහ එළවළු ඇතුළු අත්‍යවශ්‍ය භාණ්ඩ සියයට 30ක් අඩු මිලකට ලබාදීම මෙහි අරමුණයි.

මෙම වැඩපිළිවෙළ ක්‍රියාත්මක වුවහොත් සාමාන්‍ය වික්ටෝරියානු පවුලකට වසරකට ඩොලර් 4,274ක් පමණ ඉතිරි කරගත හැකි බව Greens පක්ෂය ඇස්තමේන්තු කර තිබෙනවා.

වික්ටෝරියා Greens නායිකා Ellen Sandell පවසන්නේ නිව්යෝර්ක් නගරාධිපති Zohran Mamdani ඉදිරිපත් කළ රජයට අයත් සුපිරි වෙළෙඳසල් පිහිටුවීමේ යෝජනාව ආදර්ශයට ගනිමින් මෙම සැලැස්ම සකස් කළ බවයි.

මේ අතර විශාල බැංකු සහ සූදු ව්‍යාපාර සඳහා බදු පැනවීමෙන් අවශ්‍ය මුදල් සපයාගැනීමටත්, අත්‍යවශ්‍ය ආහාර ද්‍රව්‍ය සඳහා උපරිම මිල සීමාවන් හඳුන්වාදීමටත් පක්ෂය යෝජනා කර තිබෙනවා.

කෙසේ වෙතත් ආර්ථික විශේෂඥයන් පෙන්වා දෙන්නේ රජයට අයත් සුපිරි වෙළෙඳසල් පවත්වාගෙන යෑම සඳහා සැලකිය යුතු වියදමක් දැරීමට සිදුවිය හැකි අතර වෙළෙඳපොළ තරගකාරිත්වය වැඩි කිරීමෙන්ද භාණ්ඩ මිල අඩු කළ හැකි බවයි.