මෙල්බන් බෞද්ධ විහාරස්ථානයකදී බාලවයස්කාර දැරියන් 6 දෙනෙකු ලිංගික අපයෝජනයට ලක්කිරීම සම්බන්ධයෙන් වරදකරු වූ ශ්‍රී ලාංකික බෞද්ධ භික්ෂුවක් වන නාඔටුන්නේ විජිත හිමිට වසර 13යි මාස 2ක සිරදඬුවමක් නියම කර තිබෙනවා.

වික්ටෝරියා ප්‍රාන්තයේ County Court අධිකරණය විසිනුයි මෙම දඬුවම නියම කර ඇත්තේ.

මෙල්බන්හි Springvale සහ Keysborough ප්‍රදේශවල පිහිටි Dhamma Sarana විහාරස්ථානයේ ප්‍රධාන භික්ෂුව ලෙස කටයුතු කළ ඔහු 1994 සිට 2002 දක්වා කාලය තුළ විහාරස්ථානයට පැමිණි දැරියන් 6 දෙනෙකු අපයෝජනය කර ඇති බව අධිකරණයේදී අනාවරණය වුණා.

මෙම සිරදඬුවම යටතේ හිමි නමට අවම වශයෙන් වසර 9යි මාස 4ක් සිරගතව සිටීමෙන් පසුව පමණක් කොන්දේසි සහිත නිදහස් කිරීම සඳහා සුදුසුකම් ලැබිය හැකියි.

නඩු තීන්දුව ප්‍රකාශයට පත්කළ විනිසුරු Pardeep Tiwana සඳහන් කළේ ආගමික නායකයෙකු ලෙස ඔහු කෙරෙහි දෙමාපියන් සහ දරුවන් තැබූ විශ්වාසය ඉතා බරපතළ ලෙස පාවාදී ඇති බවයි.

මෙම සිදුවීම් හේතුවෙන් වින්දිත කාන්තාවන් දශක ගණනාවක් තිස්සේ මානසික පීඩාවන්ට මුහුණදී ඇති බවද අධිකරණයේදී අනාවරණය වුණා.

දඬුවම ප්‍රකාශයට පත්කිරීමෙන් අනතුරුව භික්ෂුව අධිකරණයේ සිටි තම ආධාරකරුවන් දෙස බලා සිනාසෙමින් අත වැනීම සහ ඇතැම් ආධාරකරුවන් ඔහුට වැඳ ආචාර කිරීම වින්දිතයන්ගේ දැඩි අප්‍රසාදයට හේතු වී තිබෙනවා.

සිරදඬුවම අවසන් වීමෙන් පසු ඔහු ඔස්ට්‍රේලියාවෙන් පිටුවහල් කිරීමට ඉඩ ඇති අතර, ස්වීඩනයට ආපසු යාමට තමන් කැමැත්තෙන් සිටින බවද හිමි නම අධිකරණයට දැනුම්දී තිබෙනවා.

මීට පෙර මෙම සිද්ධිය සම්බන්ධයෙන් AusLanka TV ප්‍රවෘත්ති වාර්තා කළ අවස්ථාවේදී ඇතැම් පාර්ශ්ව අපට විරෝධය පළ කරමින් ආගමට අපහාස කරන බවට චෝදනා එල්ල කළා.

කෙසේ වෙතත්, අද අධිකරණය හමුවේ අදාළ භික්ෂුව වරදකරු බවට තහවුරු වී සිරදඬුවම් නියම කර තිබෙනවා.

ආගමික තනතුරක් හෝ සමාජ තත්ත්වයක් නීතියට ඉහළින් නොපවතින බව අපි විශ්වාස කරනවා.

ආගමික විශ්වාසයන්ට ගරු කරන අතරම, සත්‍යය සහ මහජනතාවගේ තොරතුරු දැනගැනීමේ අයිතිය වෙනුවෙන් කිසිදු බලපෑමකට යටත් නොවී, අපක්ෂපාතීව ප්‍රවෘත්ති වාර්තා කිරීමට AusLanka TV නිරන්තරයෙන් කැපවී සිටිනවා.