ඔස්ට්‍රේලියාවේ වසර 36කට පෙර නිවාස ණය පොලී අනුපාත සියයට 17ක් තරම් ඉහළ මට්ටමක පැවතියද, වර්තමානයේ තරුණ පරපුරට නිවසක් මිලදී ගැනීම එදාටත් වඩා මූල්‍යමය වශයෙන් දුෂ්කර වී ඇති බව නව පර්යේෂණයකින් අනාවරණය වී තිබෙනවා.

KPMG සහ Primara Research ආයතනවල විශ්ලේෂණ අනුව, 1990 වසරට සාපේක්ෂව අද නිවාස ණය පොලී අනුපාත අඩු වුවද නිවාස මිල සහ ලබාගත යුතු ණය මුදල් විශාල ලෙස ඉහළ යාම හේතුවෙන් ජනතාවගේ ආදායමෙන් වැඩි ප්‍රතිශතයක් ණය වාරික සඳහා වැය කිරීමට සිදුව තිබෙනවා.

1990 වසරේ සිඩ්නි නුවර සාමාන්‍ය නිවාස ණය මුදල ඩොලර් 85,000ක් පමණ වූ අතර, වර්තමානයේ එය ඩොලර් 840,000ක් පමණ දක්වා ඉහළ ගොස් ඇති බවයි පර්යේෂකයන් පෙන්වා දෙන්නේ.

මෙල්බන්හි සාමාන්‍ය ආදායමට සාපේක්ෂව නව නිවාස ණය වාරික සඳහා වැයවන ප්‍රතිශතය 1990දී 49%ක් වූ අතර, අද එය 54%ක් දක්වා ඉහළ ගොස් තිබෙනවා.

සිඩ්නි නුවර එම අගය 66%ක්, බ්‍රිස්බන්හි 59%ක් සහ ඇඩිලේඩ්හි 57%ක් දක්වා ඉහළ ගොස් ඇති බව ද අනාවරණය වුණා.

පසුගිය වසර 36 තුළ ඔස්ට්‍රේලියාවේ ප්‍රධාන නගරවල නිවාස ණය ප්‍රමාණය දස ගුණයකටත් වඩා වැඩි වී ඇති නමුත්, සාමාන්‍ය ආදායම් වර්ධනය වී ඇත්තේ තුන් හතර ගුණයකින් පමණක් බව පර්යේෂණයෙන් පෙන්වා දෙනවා.

මේ අතර ඔස්ට්‍රේලියානු සංචිත බැංකුව සැප්තැම්බර් 29 වැනිදා නිල පොලී අනුපාතය සියයට 4.60ක් දක්වා ඉහළ දැමීමත් සමඟ නිවාස ණය හිමියන්ට තවදුරටත් මූල්‍ය පීඩනයක් එල්ල වී තිබෙනවා.

කෙසේ වෙතත්, 1990 දශකයේ නිවාස ගැනුම්කරුවන් ද ඉහළ විරැකියාව සහ රැකියා අනාරක්ෂිතභාවය වැනි අභියෝගවලට මුහුණදුන් බව පර්යේෂකයන් සඳහන් කරන අතර, වර්තමානයේ තරුණයන්ට නිවසක් මිලදී ගැනීමේදී ඇති ප්‍රධාන බාධාව වන්නේ නිවාස මිලට සාපේක්ෂව ආදායම් ප්‍රමාණවත් නොවීම සහ මූලික තැන්පතුවක් ඉතිරි කරගැනීමට වසර ගණනාවක් ගතවීම බවයි ඔවුන් පෙන්වා දෙන්නේ.