ඔස්ට්‍රේලියාවේ විපක්ෂ සන්ධානය වන Coalition පක්ෂවලට සහාය දීම නතර කර One Nation පක්ෂය වටා එක්වන ලෙස Pauline Hanson ඡන්දදායකයන්ගෙන් ඉල්ලා තිබෙනවා.

ඊයේ බ්‍රිස්බන්හි පැවති Conservative Political Action Conference (CPAC) සමුළුව අමතමින් ඇය මෙම ප්‍රකාශය සිදුකළා.

ඔස්ට්‍රේලියාවේ දේශගුණික විපර්යාස සම්බන්ධ Net Zero ඉලක්කවලට එකඟවීම සහ eSafety Commissioner තනතුර ස්ථාපිත කිරීම සම්බන්ධයෙන් ඇය Liberal පක්ෂය දැඩි ලෙස විවේචනය කර තිබෙනවා.

One Nation පක්ෂය බලයට පත්වුවහොත් Net Zero දේශගුණික ප්‍රතිපත්ති සම්බන්ධයෙන් විශේෂ රාජකීය විමර්ශන කොමිසමක් පත්කරන බව ද ඇය ප්‍රකාශ කළා.

කෙසේ වෙතත්, අගමැති ඇන්තනී ඇල්බනීසිගේ Labor රජය බලයෙන් ඉවත් කිරීම සඳහා Liberal සහ National පක්ෂ සමඟ සහයෝගයෙන් කටයුතු කිරීමට තමන් සූදානම් බව Pauline Hanson අවධාරණය කර තිබෙනවා.

එම සහයෝගය නිල සන්ධාන ආණ්ඩුවක් පිහිටුවීම සඳහා නොව, අවශ්‍ය මන්ත්‍රී සහාය ලබාදී රජයක් පිහිටුවීමට හා පවත්වාගෙන යාමට පමණක් සීමාවන බව ද ඇය පැහැදිලි කළා.

මේ අතර සමුළුව ඇමතූ විපක්ෂ නායක Angus Taylor, සංක්‍රමණ ප්‍රතිපත්ති, දේශගුණික ඉලක්ක සහ කොවිඩ් සමයේ රජයේ වියදම් සම්බන්ධයෙන් Coalition පාලනය යටතේ වැරදි සිදුවූ බව පිළිගෙන තිබෙනවා.