වික්ටෝරියා ප්‍රාන්තයේ machete තහනම් කිරීමෙන් පසු ජනතාවට ආයුධ භාරදීම සඳහා ස්ථාපිත කළ විශේෂ binවලට පිහි ඇතුළු ආයුධ 12,357ක් භාරදී ඇති බව නවතම වාර්තාවකින් අනාවරණය වී තිබෙනවා.

2025 සැප්තැම්බර් මාසයේ ක්‍රියාත්මක කළ තහනමෙන් පසු පොලිස් ස්ථාන 45ක මෙම විශේෂ පෙට්ටි ස්ථාපිත කර ඇති අතර ඒවා තුළ තිබී බටර් පිහි, මුළුතැන්ගෙයි කතුරු, පොරෝ සහ ගිනිඅවි පවා හමුවී ඇති බවයි වාර්තා වන්නේ.

මීට අමතරව වෙළෙඳසල් හිමියන් විසින් භාරදුන් machete පිහි 5,674ක් සමඟ සමස්ත වැඩසටහන යටතේ භාරදුන් ආයුධ සංඛ්‍යාව 18,031ක් දක්වා ඉහළ ගොස් තිබෙනවා.

මෙම විශේෂ ආයුධ එකතු කිරීමේ bins 75ක් දකුණු ඔස්ට්‍රේලියාවේ Mount Gambier බන්ධනාගාරයේ රැඳවියන් විසින් නිෂ්පාදනය කර ඇති අතර ඒවා නිෂ්පාදනය, ස්ථාපනය සහ ආයුධ ඉවත් කිරීම ඇතුළු සේවා සඳහා ඩොලර් 925,000ක් වැය කර තිබෙනවා.

මුලින් ඩොලර් මිලියන 13ක වියදමක් ඇස්තමේන්තු කර තිබූ මෙම වැඩසටහන සඳහා අවසානයේ වැය වී ඇත්තේ ඩොලර් මිලියන 6.55ක් බවයි තොරතුරු දැනගැනීමේ පනත යටතේ ලබාගත් ලේඛනවලින් හෙළි වී ඇත්තේ.

කෙසේ වෙතත් මෙම මුදල් වැය කළ ආකාරය පිළිබඳ සම්පූර්ණ විස්තර රජය මෙතෙක් ප්‍රසිද්ධ කර නොමැති අතර ඉතිරි වූ මුදල් සාප්පු සංකීර්ණවල පොලිස් සහ ආරක්ෂක නිලධාරීන් වැඩි කිරීම සඳහා යොමු කළ බව බලධාරීන් පවසනවා.

මේ අතර 2026 වසරේ මේ දක්වා වික්ටෝරියා පොලිසිය විසින් තවත් පිහි සහ නීතිවිරෝධී තියුණු ආයුධ 11,200කට වැඩි ප්‍රමාණයක් අත්අඩංගුවට ගෙන ඇති අතර පිහි ආශ්‍රිත අපරාධ මර්දනය කිරීම තවදුරටත් ප්‍රාන්තයේ ප්‍රධාන අභියෝගයක් වී තිබෙනවා.