Flydubai ගුවන් යානයක් පැහැර ගැනීමට උත්සාහ කළ බවට චෝදනා එල්ල වී ඇති සහායක නියමුවෙකුගේ ඔස්ට්‍රේලියානු සබඳතා පිළිබඳ විමර්ශන හමුවේ, එරට ශිෂ්‍ය වීසා පරීක්ෂණ සහ ආරක්ෂක ක්‍රියාපටිපාටි පිළිබඳව අවධානය යොමුව තිබෙනවා.

අදාළ ඕමාන ජාතිකයා 2015 සිට 2017 දක්වා මෙල්බන්හි RMIT විශ්වවිද්‍යාලයේ අධ්‍යාපනය ලබා ඇති අතර, ඔහුගේ ඔස්ට්‍රේලියානු සබඳතා පිළිබඳව ෆෙඩරල් පොලිසිය ඇතුළු ආරක්ෂක අංශ විමර්ශනය කරනවා.

වාර්තා අනුව, ඔහුට 2014දී ශිෂ්‍ය වීසා නිකුත් කර තිබූ අතර, පාඨමාලාවකට ලියාපදිංචි වී නොසිටීම හේතුවෙන් 2019දී එම වීසා අවලංගු කර තිබෙනවා.

මේ අතර, ඔහුගේ ඔස්ට්‍රේලියානු කාලය තුළ සබඳතා පැවති බවට වාර්තා වන මෙල්බන්හි MyCentre සංවිධානයට සම්බන්ධ Multicultural Youth Centre ආයතනයට ඔස්ට්‍රේලියානු ඩොලර් 68,136කට වැඩි රජයේ ප්‍රදානයක් ලබාදීම සම්බන්ධයෙන් සෙනෙට් සභික Pauline Hanson ප්‍රශ්න මතු කර තිබෙනවා.

මෙම මුදල් ලබාදීමට පෙර ආරක්ෂක පරීක්ෂණ සිදු කළේද යන්න පිළිබඳව ස්වදේශ කටයුතු අමාත්‍ය Tony Burke පැහැදිලි කළ යුතු බවයි ඇය ඉල්ලා සිටින්නේ.

කෙසේ වෙතත්, අදාළ සංවිධානය ත්‍රස්ත ක්‍රියාකාරකම්වලට සම්බන්ධ බවට හෝ රජයේ මුදල් අන්තවාදී කටයුතු සඳහා යොදාගත් බවට මෙතෙක් සාක්ෂි අනාවරණය වී නැහැ.

මෙම සිද්ධියත් සමඟ ශිෂ්‍ය වීසා ලබාදීමේදී පසුබිම් පරීක්ෂණ සහ ආරක්ෂක ඇගයීම් තවදුරටත් ශක්තිමත් කළ යුතුද යන්න පිළිබඳව ඔස්ට්‍රේලියාවේ අවධානය යොමුව තිබෙනවා.