වික්ටෝරියා ප්‍රාන්තයේ ණය බර 2030 වසර වනවිට ඕස්ට්‍රේලියානු ඩොලර් බිලියන 200කට ආසන්න විය හැකි බවට පුරෝකථනය කර තිබෙනවා.

මේ වනවිට ප්‍රාන්තයේ ශුද්ධ ණය ප්‍රමාණය ඩොලර් බිලියන 175.6ක් පමණ වන අතර, එම ණය සඳහා පොලී ගෙවීමට දිනකට ඩොලර් මිලියන 24ක් පමණ වැය වන බව වාර්තා වෙනවා.

ඉදිරි වසර තුන තුළ මෙම දෛනික පොලී වියදම තවත් ඉහළ යා හැකි බවටත් අනාවැකි පළ වී ඇති අතර, 2029-2030 වනවිට වාර්ෂික පොලී වියදම ඩොලර් බිලියන 11.8කට ආසන්න විය හැකියි.

මෙම ණය තත්ත්වය සම්බන්ධයෙන් වික්ටෝරියානුවන් 1,500ක් සහභාගී වූ ජනමත සමීක්ෂණයකදී, 76%ක් ණය සහ අයවැය හිඟය පාලනය කිරීම සඳහා රජයට පැහැදිලි සැලැස්මක් අවශ්‍ය බව ප්‍රකාශ කර තිබෙනවා.

එමෙන්ම, සමීක්ෂණයට සහභාගී වූවන්ගෙන් 71%ක් ප්‍රාන්තයේ ණය තත්ත්වය පිළිබඳව පෞද්ගලිකවම කනස්සල්ලට පත්ව සිටින අතර, 65%ක් පවසා ඇත්තේ ණය සහ රජයේ වියදම් සම්බන්ධ කරුණු තම ඡන්ද තීරණයට බලපානු ඇති බවයි.

මෙම ප්‍රතිඵල අනුව, ප්‍රාන්තයේ ණය පාලනය කිරීම සහ මහජන මුදල් කළමනාකරණය කිරීම සම්බන්ධයෙන් රජය ඉදිරිපත් කරන සැලසුම් පිළිබඳව ජනතාවගේ අවධානය යොමු වී තිබෙනවා.

ඒ අනුව, වික්ටෝරියා ප්‍රාන්තයේ ණය බර සහ පොලී වියදම් ඉදිරි කාලයේදීත් වැදගත් මහජන කාරණයක් වනු ඇති අතර, ණය අඩු කිරීම සඳහා දේශපාලන පක්ෂ ඉදිරිපත් කරන යෝජනා කෙරෙහිද අවධානය යොමු වනු ඇති.