ඔස්ට්‍රේලියාවේ ජීවත් වන ජනතාවට සහන සලසමින්, රජයේ ඖෂධ සහනාධාර ක්‍රමය වන Pharmaceutical Benefits Scheme හෙවත් PBS යටතේ ලබාගන්නා සුදුසුකම් ලත් ඖෂධ සඳහා ගෙවිය යුතු උපරිම මුදල අඩු කර තිබෙනවා.

ඒ අනුව, 2026 ජනවාරි 1 වැනිදා සිට සාමාන්‍ය Medicare කාඩ්පත් හිමියන්ට PBS යටතේ ලැයිස්තුගත කර ඇති සුදුසුකම් ලත් එක් ඖෂධ වට්ටෝරුවක් සඳහා ගෙවිය යුතු උපරිම මුදල ඔස්ට්‍රේලියානු ඩොලර් 31.60 සිට ඩොලර් 25 දක්වා අඩු වී තිබෙනවා.

මේ අතර, සහන කාඩ්පත් හිමියන් සඳහා එක් ඖෂධ වට්ටෝරුවකට අය කරන උපරිම මුදල ඩොලර් 7.70ක් ලෙස 2030 වසර දක්වා පවත්වාගෙන යාමට නියමිතයි. මෙමගින් විශ්‍රාමිකයන් ඇතුළු සුදුසුකම් ලබන ජනතාවට ඖෂධ වියදම් සම්බන්ධයෙන් වැඩි සහනයක් සහ ස්ථාවරත්වයක් හිමිවන බව සඳහන්.

ඔස්ට්‍රේලියාවේ PBS ක්‍රමය යටතේ ඖෂධ වර්ග 900කට වැඩි සංඛ්‍යාවකට සහනාධාර ලබාදෙන අතර, එමගින් අත්‍යවශ්‍ය ඖෂධ අඩු මිලකට ලබාගැනීමට රෝගීන්ට අවස්ථාව සැලසෙනවා.

එමෙන්ම, ඇතැම් දිගුකාලීන සහ ස්ථාවර සෞඛ්‍ය තත්ත්වයන් සඳහා ප්‍රතිකාර ලබන රෝගීන්ට, සුදුසුකම් අනුව, එක් වට්ටෝරුවකින් දින 60කට ප්‍රමාණවත් ඖෂධ ලබාගැනීමේ පහසුකම ද පවතිනවා. එමගින් ඖෂධ මිලදී ගැනීම සඳහා වැයවන මුදල් මෙන්ම ෆාමසි වෙත යාමට සිදුවන වාර ගණන ද අඩු කරගැනීමට හැකියාව ලැබෙනවා.

කෙසේ වෙතත්, ඇතැම් ඖෂධ සන්නාම සඳහා අමතර ගාස්තු අය විය හැකි අතර, PBS යටතේ ආවරණය නොවන ඖෂධ සඳහා වැඩි මුදලක් ගෙවීමට සිදුවිය හැකි බවත් සඳහන්.

මෙම පියවර හරහා ඔස්ට්‍රේලියානු පවුල්වල ඖෂධ වියදම් අඩු කරමින්, අත්‍යවශ්‍ය ප්‍රතිකාර සඳහා ප්‍රවේශය වඩාත් පහසු කිරීම රජයේ අරමුණ වී තිබෙනවා.