Qantas ගුවන් සමාගමට අයත් මගී ගුවන් යානයක මකුණන් (Bed Bugs) හමුවීම හේතුවෙන් ඉතාලියේ රෝම නුවර සිට පර්ත් දක්වා පැමිණීමට නියමිතව තිබූ ගුවන් ගමනක් අවලංගු කිරීමට සිදුව තිබෙනවා.

ඔක්තෝබර් 9 වැනිදා පර්ත් සිට රෝමය බලා පියාසර කළ QF5 ගුවන් යානයේ සිටි මගීන් කිහිපදෙනෙකු මකුණන් සපා කන බව ගුවන් සේවකයන් වෙත පැමිණිලි කිරීමත් සමඟ මෙම සිදුවීම අනාවරණය වුණා.

Boeing 787 Dreamliner වර්ගයේ මෙම ගුවන් යානයේ Economy Class ආසන කිහිපයක මකුණන් සිට ඇති බව හඳුනාගෙන ඇති අතර, සපා කෑමට ලක්වූ මගීන්ට කැසීම සහ ආසාත්මිකතා තත්ත්වයන් පාලනය කිරීම සඳහා Antihistamine ඖෂධ ලබාදී තිබෙනවා.

මෙම තත්ත්වය හේතුවෙන් ඔක්තෝබර් 10 වැනිදා රෝමයේ සිට පර්ත් බලා පිටත්වීමට නියමිතව තිබූ QF6 ගුවන් ගමන අවලංගු කර, ගුවන් යානය සම්පූර්ණයෙන් පිරිසිදු කිරීමේ විශේෂ වැඩපිළිවෙළක් ක්‍රියාත්මක කර තිබෙනවා.

ගුවන් ගමන අවලංගු වීමෙන් අපහසුතාවයට පත්වූ මගීන්ට නවාතැන් පහසුකම් ලබාදී ඇති අතර, මුලින් සැලසුම් කළ පිටත්වීමේ වේලාවේ සිට පැය 48ක් ඇතුළත විකල්ප ගුවන් ගමන් සඳහා ඔවුන් නැවත වෙන්කරවා ඇති බව Qantas සමාගම සඳහන් කරනවා.

සිදුවීම සම්බන්ධයෙන් මගීන්ගෙන් සමාව ඉල්ලා ඇති Qantas සමාගම පවසන්නේ ගැටලුව Economy Class ආසන සුළු සංඛ්‍යාවකට පමණක් සීමා වී ඇති අතර, ගුවන් යානාවලට දින 50කට වරක් පූර්වාරක්ෂක කෘමි පාලන ප්‍රතිකාර සිදුකරන බවයි.

මේ අතර NSW Health ආයතනය පෙන්වා දෙන්නේ මකුණන් මිනිස් රුධිරය ආහාරයට ගන්නා කුඩා පරපෝෂිත කෘමීන් වුවද, ඔවුන් හරහා රෝග පැතිරෙන බවට මෙතෙක් සාක්ෂි නොමැති බවයි.

කෙසේ වෙතත් මකුණන් දෂ්ට කිරීමෙන් සමේ කැසීම, නින්දට බාධා සහ අධික ලෙස කැසීම හේතුවෙන් සමේ ආසාදන ඇතිවීමේ අවදානම පවතින බව ද සෞඛ්‍ය අංශ පෙන්වා දෙනවා.