ඇමරිකාවේදී පුද්ගලයෙකුට වෙඩි තබා මරණ දඬුවම ක්‍රියාත්මක කරන ආකාරය අන්තර්ජාලය ඔස්සේ සජීවීව විකාශය කිරීමට සැලසුම් කර ඇති අතර, එම දර්ශන ඔස්ට්‍රේලියානු ජනතාවට නැරඹීමට නොහැකි වන පරිදි අවශ්‍ය පියවර ගන්නා බව අගමැති Anthony Albanese ප්‍රකාශ කර තිබෙනවා.

2009 වසරේ ඇමරිකාවේ ටෙක්සාස් ප්‍රාන්තයේ Fort Hood හමුදා කඳවුරේදී පුද්ගලයන් 13 දෙනෙකු ඝාතනය කිරීම සම්බන්ධයෙන් වරදකරු වූ හිටපු ඇමරිකානු හමුදා වෛද්‍ය නිලධාරී Nidal Malik Hasan හට දෙසැම්බර් 3 වැනිදා මරණ දඬුවම ක්‍රියාත්මක කිරීමට නියමිතයි.

ඇමරිකානු ආරක්ෂක ලේකම් Pete Hegseth විසින් මෙම මරණ දඬුවම ක්‍රියාත්මක කරන ආකාරය ජනතාවට සජීවීව නැරඹීමට අවස්ථාව ලබාදෙන බව ප්‍රකාශ කර ඇති අතර, එය ලොව පුරා දැඩි අවධානයට ලක්ව තිබෙනවා.

කෙසේ වෙතත් ඇමරිකානු ජනාධිපති Donald Trump විසින් එම සජීවී විකාශය පිළිබඳ අවසන් තීරණය මෙතෙක් ගෙන නොමැති අතර, උප ජනාධිපති JD Vance ද එවැනි විකාශයක් සිදුකිරීම සම්බන්ධයෙන් සැක පළකර තිබෙනවා.

මෙම සිදුවීම සම්බන්ධයෙන් අදහස් දක්වමින් අගමැති Albanese සඳහන් කර ඇත්තේ ඔස්ට්‍රේලියාව දිගුකාලීනව මරණ දඬුවමට විරුද්ධ ස්ථාවරයක් දරන රටක් වන අතර, පුද්ගලයෙකුගේ මරණය සජීවීව ප්‍රදර්ශනය කිරීම තමන් කිසිසේත් අනුමත නොකරන බවයි.

විශේෂයෙන්ම Facebook, YouTube, TikTok ඇතුළු සමාජ මාධ්‍යවලට මෙවැනි දර්ශන ප්‍රචාරය නොකිරීමේ සමාජ වගකීමක් පවතින බව ද අගමැතිවරයා අවධාරණය කර තිබෙනවා.

මේ අතර ඔස්ට්‍රේලියාවේ eSafety Commission ආයතනය පෙන්වා දෙන්නේ මෙවැනි සජීවී විකාශයක් අන්තර්ජාලයට එක්වීමට පෙර සෘජුවම අවහිර කිරීමට තමන්ට නීතිමය බලතල නොමැති නමුත්, හානිකර අන්තර්ගතයෙන් පරිශීලකයන් ආරක්ෂා කිරීමේ වගකීම අන්තර්ජාල සේවා සපයන ආයතනවලට පවතින බවයි.

ඔස්ට්‍රේලියානු විදේශ අමාත්‍ය Penny Wong ද මෙම සිදුවීම පිළිබඳ කනස්සල්ල පළකර ඇති අතර, දරුවන් සහ තරුණ පිරිස් මෙවැනි ප්‍රචණ්ඩ දර්ශනවලට නිරාවරණය වීම වැළැක්විය යුතු බව සඳහන් කර තිබෙනවා.

කෙසේ වෙතත් මෙම විකාශය සිදුකළහොත් එය ඇමරිකාවේ මරණ දඬුවමක් සජීවීව අන්තර්ජාලය ඔස්සේ ප්‍රචාරය කරන පළමු අවස්ථාව ලෙස ඉතිහාසයට එක්වනු ඇති බවයි වාර්තා වන්නේ.