Powerball ලොතරැයි ඉතිහාසයේ තුන්වැනි විශාලතම තනි ටිකට්පත් ජයග්‍රහණයට හිමිකම් කියමින් නිව් සවුත් වේල්ස් ප්‍රාන්තයේ කාන්තාවක් ඩොලර් මිලියන 100ක දැවැන්ත මුදල් ත්‍යාගයක් දිනාගෙන තිබෙනවා.

ඊයේ පැවති Powerball Draw 1587 දිනුම් ඇදීමේදී මෙම ජයග්‍රහණය හිමිව ඇත්තේ NSW ප්‍රාන්තයේ Ballina ප්‍රදේශයේ පදිංචි කාන්තාවකටයි.

පවුලේ අනෙකුත් සාමාජිකයන් සියලුදෙනාම ලොතරැයි ටිකට්පත් මිලදී ගැනීම නිසා තමන්ට ද අවස්ථාවක් අහිමි වේ යැයි සිතූ ඇය, දිනුම් ඇදීම අවසන් වීමට සුළු වේලාවකට පෙර අන්තර්ජාලය ඔස්සේ ටිකට් පතක් මිලදී ගෙන තිබෙනවා.

ජයග්‍රහණය දැනුම්දීම සඳහා The Lott ආයතනයෙන් දුරකථන ඇමතුමක් ලැබුණු අවස්ථාවේදී ඇය දැඩි පුදුමයට පත්ව ඇති අතර, මුලින් එය තම ඥාතියකු කළ විහිළුවක් බවට ද සැක කර තිබෙනවා.

පවුලේ සාමාජිකයන් සමඟ මෙම සතුට බෙදාගත් ඇය ප්‍රකාශ කර ඇත්තේ, මෑතකදී මියගිය තම පවුලේ සාමාජිකයකුගේ ආශීර්වාදයක් ලෙස තමන් මෙම ජයග්‍රහණය සලකන බවයි.

මෙම දිනුම් ඇදීමේ දෙවැනි ත්‍යාග කාණ්ඩයෙන් පුද්ගලයන් 12 දෙනෙකුට ඩොලර් 172,000කට වැඩි මුදලක් බැගින් හිමිව ඇති අතර, තුන්වැනි ත්‍යාග කාණ්ඩයෙන් ටිකට්පත් 186කට ඩොලර් 13,700කට වැඩි මුදලක් බැගින් හිමිව තිබෙනවා.