මෙල්බන්හි Monash Children’s Hospitalහිදී 2022 වසරේ මියගිය අට හැවිරිදි Amrita Lanka නමැති දැරියගේ මරණය වළක්වාගත හැකිව තිබූ බව වික්ටෝරියා ප්‍රාන්තයේ මරණ පරීක්ෂණයකින් අනාවරණය වී තිබෙනවා.

ඔක්කාරය, වමනය සහ උදරයේ වේදනාව හේතුවෙන් මෙම දැරිය රෝහලේ හදිසි ප්‍රතිකාර අංශයට ඇතුළත් කර ඇති අතර, මුලින් වෛද්‍යවරුන් ඇය ආමාශය සහ කුඩා අන්ත්‍රය ආශ්‍රිත ආසාදන තත්ත්වයකින් පෙළෙන බවට සැක කර තිබුණා.

කෙසේ වෙතත්, ඇගේ රෝග ලක්ෂණ ක්‍රමයෙන් උත්සන්න වී ඇති අතර, පසුව සිදුකළ වෛද්‍ය පරීක්ෂණවලදී හෘද පේශිවල ඇතිවන දැවිල්ලක් වන Myocarditis තත්ත්වය පිළිබඳ සැක මතුව තිබෙනවා.

එම අවස්ථාවේ සිදුකළ රුධිර පරීක්ෂණවලින් අනතුරු ඇඟවීමේ ලක්ෂණ හඳුනාගෙන තිබුණද, ඒවාට නිසි අවධානයක් යොමු නොවූ බව මරණ පරීක්ෂණයේදී අනාවරණය වී ඇති අතර, දැරියගේ තත්ත්වය බරපතළ නොවන බවට වෛද්‍යවරයකු විසින් තක්සේරු කර තිබූ බව ද සඳහන්.

පසුව දැරියගේ හෘදය ක්‍රියා විරහිත වීමේ තත්ත්වයක් ඇතිවී තිබූ අතර, ඇය Royal Children’s Hospital වෙත මාරු කිරීමට සැලසුම් කරමින් සිටියදී නැවතත් හෘදය නතර වීම හේතුවෙන් ඇගේ ජීවිතය බේරාගැනීමට නොහැකි වී තිබෙනවා.

මෙම සිද්ධිය පිළිබඳ තීන්දුව ප්‍රකාශයට පත්කළ නියෝජ්‍ය ප්‍රාන්ත මරණ පරීක්ෂක Paresa Spanos සඳහන් කර ඇත්තේ, දැරියට ලබාදුන් වෛද්‍ය ප්‍රතිකාර සහ රැකවරණයේ පැවති අඩුපාඩු ඇගේ මරණයට හේතු වී ඇති බවයි.

දැරියගේ මවගේ ප්‍රකාශයක් කියවමින් සිටියදී මරණ පරීක්ෂකවරිය ද දැඩි සංවේගයට පත්ව කඳුළු සලමින් සිය ප්‍රකාශය මොහොතකට නතර කර ඇති අතර, Monash Health ආයතනය මරණ පරීක්ෂණයේ සොයාගැනීම් පිළිගෙන, දැරියගේ මරණයෙන් පසු රෝහලේ ප්‍රතිකාර ක්‍රමවේදවල වෙනස්කම් සිදුකර ඇති බව ප්‍රකාශ කර තිබෙනවා.