ක්වීන්ස්ලන්ඩ් ප්‍රාන්තයේ සිරදඬුවම් විඳින කාන්තාවකට අනාගතයේදී දරුවන් බිහිකිරීමේ හැකියාව ආරක්ෂා කරගැනීම සඳහා තම ඩිම්බ ශීතකර සුරක්ෂිත කරගැනීමට අදාළ අයදුම්පතක් ඉදිරිපත් කළ හැකි බවට ඔස්ට්‍රේලියානු මහාධිකරණය (High Court) සුවිශේෂී තීන්දුවක් ලබාදී තිබෙනවා.

මත්ද්‍රව්‍ය ජාවාරම් කිරීමේ චෝදනාවට වරදකාරිය වී වසර 10ක සිරදඬුවමක් විඳින Rachel Smith නමැති කාන්තාව මෙම නීතිමය සටන ආරම්භ කර තිබුණේ තමන්ගේ පෞද්ගලික මුදලින් Egg Freezing හෙවත් ඩිම්බ ශීතකර සුරක්ෂිත කිරීමේ වෛද්‍ය ක්‍රියාවලියක් සිදුකර ගැනීමට අවසර ඉල්ලමින්.

කෙසේ වෙතත්, ක්වීන්ස්ලන්ඩ් බන්ධනාගාර බලධාරීන් විසින් සිරකරුවන්ට Assisted Reproductive Technology භාවිත කිරීම තහනම් බව පවසමින් 2024 වසරේදී ඇයගේ ඉල්ලීම ප්‍රතික්ෂේප කර තිබුණා.

එම තීරණයට එරෙහිව ඇය මුලින් ක්වීන්ස්ලන්ඩ් ශ්‍රේෂ්ඨාධිකරණයට සහ පසුව අභියාචනාධිකරණයට ඉදිරිපත් කළ අභියාචනා අසාර්ථක වූ අතර, අවසානයේ ඔස්ට්‍රේලියාවේ ඉහළම අධිකරණය වෙත අභියාචනයක් ඉදිරිපත් කර තිබෙනවා.

අද නඩුවේ තීන්දුව ප්‍රකාශයට පත් කළ High Court විනිසුරුවරුන් පස්දෙනෙකුගෙන් සමන්විත විනිසුරු මඬුල්ල ඇයගේ අභියාචනය පිළිගනිමින්, ඩිම්බ ලබාගෙන ශීතකර සුරක්ෂිත කිරීම අදාළ නීතියෙන් තහනම් කර ඇති ප්‍රජනන තාක්ෂණ ක්‍රියාවලියට අයත් නොවන බවයි තීරණය කර ඇත්තේ.

ඒ අනුව, බන්ධනාගාර බලධාරීන් විසින් 2024 වසරේදී ලබාදුන් ප්‍රතික්ෂේප කිරීමේ තීරණය අවලංගු කර ඇති අතර, ඇයගේ ඉල්ලීම නීතියට අනුකූලව නැවත සලකා බලන ලෙසත්, නඩු වියදම් ගෙවන ලෙසත් Queensland Corrective Services ආයතනයට නියෝග කර තිබෙනවා.

කෙසේ වෙතත්, මෙම තීන්දුවෙන් ඇයට වහාම ඩිම්බ ශීතකර සුරක්ෂිත කිරීමේ ප්‍රතිකාරය ලබාගැනීමට අවසර ලබාදී නොමැති අතර, ඒ පිළිබඳ අවසන් පරිපාලන තීරණය ගැනීම බන්ධනාගාර බලධාරීන්ට පැවරී තිබෙනවා.