ඔස්ට්‍රේලියාවේ වයස අවුරුදු 65ට වැඩි පුද්ගලයන්ගේ පෞද්ගලික සෞඛ්‍ය රක්ෂණ සහනාධාරය අඩු කිරීමට ෆෙඩරල් රජය ඉදිරිපත් කළ යෝජනාව සෙනෙට් සභාවේදී පසුබැස තිබෙනවා.

මෙම යෝජනාවට අදාළ පනත් කෙටුම්පත සෙනෙට් සභාවේ න්‍යාය පත්‍රයෙන් ඉවත් කිරීමට විපක්ෂය, Greens පක්ෂය සහ ස්වාධීන සෙනෙට් සභිකයන්ගේ සහාය ලැබී තිබෙනවා.

රජයේ සැලැස්ම වූයේ වයස අවුරුදු 65ට වැඩි පුද්ගලයන්ට දැනට ලැබෙන ඉහළ සෞඛ්‍ය රක්ෂණ සහනාධාරය අඩු කර, වසර හතරක් තුළ ඩොලර් බිලියන 3ක පමණ මුදලක් ඉතිරි කර ගැනීමයි. එම මුදල් වැඩිහිටි සත්කාර සේවා සඳහා යොදාගැනීමට රජය සැලසුම් කර තිබුණා.

කෙසේ වෙතත්, මෙම වෙනස හේතුවෙන් විශ්‍රාමිකයන් ඇතුළු වැඩිහිටි පුද්ගලයන්ට තම සෞඛ්‍ය රක්ෂණ වාරික ගෙවීම තවත් අපහසු වනු ඇති බවට විවේචන එල්ල වුණා.

සෞඛ්‍ය දෙපාර්තමේන්තුවේ ඇස්තමේන්තු අනුව, මෙම යෝජනාව ක්‍රියාත්මක වුවහොත් 2030 වන විට වයස අවුරුදු 65ට වැඩි පුද්ගලයන් 78,000කට ආසන්න පිරිසක් තම පෞද්ගලික සෞඛ්‍ය රක්ෂණය අත්හැරිය හැකි බවටද අනාවැකි පළ වී තිබෙනවා.

සහනාධාරය අඩු කිරීමෙන් අඩු ආදායම්ලාභී වැඩිහිටියන්ටද බලපෑම් ඇතිවිය හැකි බව විවේචකයන් පෙන්වා දෙනවා. එමෙන්ම පෞද්ගලික රෝහල්වලින් ඉවත් වන රෝගීන් රජයේ රෝහල් වෙත යොමුවීමෙන් එම සේවාවලට ඇති පීඩනය වැඩි විය හැකි බවටත් අනතුරු ඇඟවී තිබෙනවා.

කෙසේ වෙතත්, සෞඛ්‍ය අමාත්‍ය Mark Butler පවසන්නේ වැඩිහිටි සත්කාර සේවා සඳහා අරමුදල් සැපයීමේ අවශ්‍යතාව මත මෙම යෝජනාව ඉදිරිපත් කළ බවයි. පනත් කෙටුම්පත නැවත පාර්ලිමේන්තුවට ඉදිරිපත් කිරීමට රජය සැලසුම් කර ඇති බවද වාර්තා වනවා.

ඒ අනුව, වැඩිහිටියන්ගේ පෞද්ගලික සෞඛ්‍ය රක්ෂණ සහනාධාරය සම්බන්ධයෙන් රජය ගෙන යන ඉදිරි පියවර පිළිබඳව අවධානය යොමුව තිබෙනවා.