COVID-19 වසංගත සමයේ වික්ටෝරියා ප්‍රාන්තයේ ව්‍යාපාර සඳහා ලබාදුන් රජයේ මූල්‍ය ආධාරවලින් ඩොලර් මිලියන 257කට ආසන්න මුදලක් සුදුසුකම් නොලැබූ ව්‍යාපාර 9,000කට අධික සංඛ්‍යාවකට ගෙවා ඇති බව නව දූෂණ විරෝධී පරීක්ෂණයකින් අනාවරණය වී තිබෙනවා.

වික්ටෝරියා ප්‍රාන්තයේ ස්වාධීන දූෂණ විරෝධී කොමිසම වන IBAC ආයතනය සිදුකළ Operation Harmonia පරීක්ෂණයේදී මෙම කරුණු හෙළි වී ඇති අතර, අදාළ මුදල් ගෙවීම් සම්බන්ධයෙන් රජයේ ඉහළ නිලධාරීන් තොරතුරු වසන් කර ඇති බව ද හඳුනාගෙන තිබෙනවා.

වසංගත සමයේ මෙල්බන් නගරය ඇතුළු ප්‍රදේශවල දිගින් දිගටම පැවති Lockdown තත්ත්වයන් හේතුවෙන් පීඩාවට පත් ව්‍යාපාර සඳහා රජය ඩොලර් බිලියන ගණනක මූල්‍ය ආධාර ලබාදී තිබූ අතර, එම ආධාර ලබාගැනීම සඳහා ව්‍යාපාර GST බද්දට ලියාපදිංචි වී සිටීම අනිවාර්ය අවශ්‍යතාවක් වී තිබුණා.

කෙසේ වෙතත්, ඇතැම් ව්‍යාපාර GST ලියාපදිංචි දිනය අතීතයට බලපාන ලෙස වෙනස් කරමින් ආධාර සඳහා සුදුසුකම් ලබාගෙන ඇති බවට සැක මතුව තිබූ අතර, 2021 සහ 2022 වසරවලදී එවැනි ගෙවීම් හේතුවෙන් ඩොලර් මිලියන 285ක පමණ මුදලක් වැරදි ලෙස ගෙවා තිබිය හැකි බව රජයේ නිලධාරීන් හඳුනාගෙන තිබෙනවා.

එහෙත් මෙම ගැටලුව පිළිබඳව එවකට කර්මාන්ත සහාය පිළිබඳ අමාත්‍ය Martin Pakula වෙත නිසි තොරතුරු ලබා නොදී ඇති අතර, ජ්‍යෙෂ්ඨ රාජ්‍ය නිලධාරීන් තිදෙනකු විසින් අදාළ තොරතුරු වාර්තාවලින් ඉවත් කර හෝ වසන් කර ඇති බව පරීක්ෂණයෙන් අනාවරණය වී තිබෙනවා.

IBAC කොමිසම පෙන්වා දෙන්නේ, තොරතුරු වසන් කිරීමට දේශපාලන බලපෑම් එල්ල වූ බවට සාක්ෂි හමු නොවූ නමුත්, අමාත්‍යවරයාගේ අප්‍රසාදයට ලක්වීම හෝ දෙපාර්තමේන්තුවේ කීර්තිනාමයට හානි වීම වළක්වාගැනීමේ අරමුණින් නිලධාරීන් ස්වයං වාරණයක නිරත වී ඇති බවයි.

මේ අතර, වික්ටෝරියා විපක්ෂ නායිකා Jess Wilson මෙම වාර්තාව සම්බන්ධයෙන් අදහස් දක්වමින්, වසංගත සමයේ බදු ගෙවන්නන්ගේ මුදල් කළමනාකරණය කිරීමේදී ලේබර් රජය අසාර්ථක වූ බවට මෙය තවත් සාක්ෂියක් බව ප්‍රකාශ කර තිබෙනවා.