ඔස්ට්‍රේලියාවේ මෙල්බන් නගරය සහ ඒ අවට ප්‍රදේශ රැසක නිවාස මිල ඉදිරි වසර පහ තුළ සැලකිය යුතු ලෙස ඉහළ යා හැකි බව නව දත්ත විශ්ලේෂණයකින් අනාවරණය වී තිබෙනවා.

ඔස්ට්‍රේලියාවේ ප්‍රමුඛතම දේපළ වෙළෙඳපොළ වෙබ් අඩවියක් වන realestate.com.au විසින් සිදුකර ඇති මෙම විශ්ලේෂණයට අනුව, 2031 වසර වනවිට මෙල්බන්හි ප්‍රදේශ 69ක නිවාස වටිනාකම ඩොලර් ලක්ෂයකට වැඩි ප්‍රමාණයකින් ඉහළ යා හැකි බව සඳහන් වෙනවා.

මෙම ලැයිස්තුවේ ඉදිරියෙන්ම සිටින Langwarrin ප්‍රදේශයේ ඩොලර් 875,000ක් පමණ වන නිවසක වටිනාකම 2031 වසර වනවිට ඩොලර් මිලියන 1.14ක් දක්වා ඉහළ යා හැකි බවට ඇස්තමේන්තු කර තිබෙනවා.

ඒ අනුව Frankston North ප්‍රදේශයේ ඩොලර් 642,000ක් පමණ වන නිවසක වටිනාකම ඩොලර් 831,000ක් දක්වාත්, Mickleham ප්‍රදේශයේ ඩොලර් 683,000ක් වන නිවසක වටිනාකම ඩොලර් 884,000ක් දක්වාත් ඉහළ යා හැකි බව පෙන්වා දෙනවා.

එමෙන්ම Balnarring ප්‍රදේශයේ නිවාස වටිනාකම ඩොලර් මිලියන 1.29 සිට මිලියන 1.66ක් දක්වාත්, Rockbank ප්‍රදේශයේ ඩොලර් 616,000 සිට ඩොලර් 793,000ක් දක්වාත් ඉහළ යා හැකි බවට ඇස්තමේන්තු කර තිබෙනවා.

මීට අමතරව Coburg North, Baxter, Doveton, Narre Warren North සහ Cannons Creek යන ප්‍රදේශ ද ඉදිරි වසර පහ තුළ නිවාස මිල සැලකිය යුතු ලෙස වර්ධනය විය හැකි ප්‍රදේශ අතරට ඇතුළත් වෙනවා.

මෙම විශ්ලේෂණයට අනුව, 2036 වසර වනවිට මෙල්බන්හි ඩොලර් මිලියනයකට වැඩි නිවාස වටිනාකමක් ඇති ප්‍රදේශ සංඛ්‍යාව 188 සිට 372 දක්වා ඉහළ යා හැකි බවද පුරෝකථනය කර තිබෙනවා.

කෙසේ වෙතත්, මෙම ඇස්තමේන්තු අතීත දේපළ මිල වර්ධන රටා මත පදනම් වූ ගණනය කිරීම් වන අතර, පොලී අනුපාත, ජනගහන වර්ධනය, නිවාස සැපයුම සහ ආර්ථික තත්ත්වයන් අනුව සැබෑ නිවාස මිල වෙනස් විය හැකි බවද විශ්ලේෂකයන් අවධාරණය කරනවා.