ඔස්ට්‍රේලියාවේ ඉන්ධන පිරවුම්හල්වලදී දරුවන් වාහනය තුළ තනිවම තබා මුදල් ගෙවීමට යාමෙන් රියදුරන්ට ඩොලර් 36,000ක් දක්වා දඩයකට මුහුණ දීමට සිදුවිය හැකි බවට අවධානය යොමුව තිබෙනවා.

විශේෂයෙන්ම ඉන්ධන පිරවීමෙන් පසු මුදල් ගෙවීමට සේවා මධ්‍යස්ථානය තුළට යන අවස්ථාවලදී, දරුවන් වාහනය තුළ තනිවම තැබීම ඇතැම් ප්‍රාන්තවල නීති උල්ලංඝනය කිරීමක් විය හැකියි.

Western Australia ප්‍රාන්තයේදී දරුවෙකු මානසික පීඩාවකට හෝ තුවාලයකට ලක්වීමේ අවදානමක් ඇති වන අයුරින් වාහනයක තනිවම තැබීම සම්බන්ධයෙන් අධිකරණය හමුවේ ඩොලර් 36,000ක් දක්වා දඩයක් සහ වසර තුනක් දක්වා සිරදඬුවමක් නියම කළ හැකියි.

New South Wales ප්‍රාන්තයේදී අදාළ තත්ත්වයන් අනුව ඩොලර් 22,000ක් දක්වා දඩයක්ද, Victoria ප්‍රාන්තයේදී ඩොලර් 5,228ක් දක්වා දඩයක් හෝ මාස හයක් දක්වා සිරදඬුවමක්ද නියම විය හැකි බව වාර්තා වනවා.

මෙවැනි අවදානම් වළක්වා ගැනීම සඳහා APCO, 7-Eleven, BP, Ampol සහ Reddy Express වැනි ඉන්ධනහල්වල යෙදුම් මගින් වාහනය තුළ සිටම ඉන්ධන සඳහා ගෙවීමේ පහසුකම් ලබාගත හැකියි.

එමෙන්ම Costco, U-GO සහ Liberty වැනි ඇතැම් ඉන්ධනහල්වල සේවකයෙකු වෙත නොගොස් ඉන්ධන පිරවුම් යන්ත්‍රය අසලදීම ගෙවීම් කිරීමේ පහසුකම් පවතිනවා.

විශේෂයෙන්ම උණුසුම් කාලගුණය තුළ වාහන ඇතුළත උෂ්ණත්වය වේගයෙන් ඉහළ යා හැකි බැවින්, කෙටි වේලාවකට වුවද දරුවන් වාහනය තුළ තනිවම නොතබන ලෙස දෙමාපියන්ට සහ භාරකරුවන්ට අවධාරණය කෙරෙනවා.

#RoadSafety #ChildSafety #PetrolStation #FuelStation #AustralianDrivers #DrivingLaws