ඔස්ට්‍රේලියාවේ මෙල්බන් ප්‍රදේශයෙන් සතියක් තුළ වෙඩි තැබීම් සිදුවීම් තුනක් වාර්තා වීමත් සමඟ ඒ පිළිබඳ පොලිස් විමර්ශන ක්‍රියාත්මක වනවා.

එම සිදුවීම් අතරින් බරපතළම සිදුවීම වාර්තා වුණේ මෙල්බන්හි Wollert ප්‍රදේශයෙන්. එහිදී 42 හැවිරිදි පුද්ගලයකු වෙඩි තබා ඝාතනය කර තිබෙනවා.

ඔක්තෝබර් 15 වනදා සවස Gypsum Drive හි පිහිටි නිවසකදී සිදුවූ මෙම ඝාතනය ඉලක්ක කර එල්ල කළ ප්‍රහාරයක් බවට පොලිසිය සැක පළ කරනවා. සිද්ධියට සම්බන්ධ පුද්ගලයන් සොයා විමර්ශන සිදු කෙරෙන අතර, මෙතෙක් කිසිදු අත්අඩංගුවට ගැනීමක් වාර්තා වී නැහැ.

මේ අතර, ඔක්තෝබර් 14 වනදා අලුයම Caroline Springs ප්‍රදේශයේ නිවසකට මෝටර් රථයකින් පැමිණ වෙඩි තැබීමක් සිදුකර තිබුණා. එම අවස්ථාවේ නිවස තුළ පුද්ගලයන් සිව්දෙනකු සිටියද කිසිවකුටත් තුවාල සිදුවී නැහැ.

එදිනම Tullamarine ප්‍රදේශයේදී මාර්ග ආරවුලක් සමඟ සම්බන්ධ බවට සැක කෙරෙන තවත් වෙඩි තැබීමක් වාර්තා වුණා. එහිදී කිසිවකුටත් තුවාල සිදුවී නොමැති බව පොලිසිය සඳහන් කරනවා.

මෙම වෙඩි තැබීම් තුන අතර සම්බන්ධයක් පවතින්නේද යන්න මෙතෙක් තහවුරු වී නැහැ. සිද්ධීන් සම්බන්ධයෙන් වැඩිදුර විමර්ශන සිදුකරන පොලිසිය, තොරතුරු ඇති ඕනෑම අයකුගෙන් සහාය ඉල්ලා සිටිනවා.