අධික උණුසුම් කාලගුණය සහ ගල්අඟුරු බලාගාර කිහිපයක් අක්‍රිය වීම හේතුවෙන් විදුලි මිල ගණන් සීඝ්‍රයෙන් ඉහළ යාමත් සමඟ, නිවාසවල විදුලි බැටරි සවි කර ඇති ජනතාවට පැය දෙකක් ඇතුළත ඔස්ට්‍රේලියානු ඩොලර් මිලියන දෙකකට ආසන්න ආදායමක් උපයා ගැනීමට අවස්ථාව ලැබී තිබේ.

පසුගිය සඳුදා නිව් සවුත් වේල්ස් ප්‍රාන්තයේ තොග විදුලි වෙළෙඳපොළේ මිල ගණන් අසාමාන්‍ය ලෙස ඉහළ ගොස් තිබුණි.

පස්වරු 3.30ට පමණ මෙගාවොට් පැයකට ඔස්ට්‍රේලියානු ඩොලර් 23,107ක් දක්වා විදුලි මිල ඉහළ ගිය අතර, එය වෙළෙඳපොළේ උපරිම මිල සීමාවට ආසන්න අගයක්

මෙම තත්ත්වය නිර්මාණය වීමට ප්‍රධාන වශයෙන් හේතු වී ඇත්තේ අධික උෂ්ණත්වය නිසා විදුලි ඉල්ලුම ඉහළ යාමත්, ගල්අඟුරු බලාගාර කිහිපයක් ක්‍රියා විරහිත වීමත් සහ විදුලි සම්ප්‍රේෂණ මාර්ගවල පැවති සීමාවනුත් බවයි පැවසෙන්නේ.

එම අවස්ථාවේදී නිව් සවුත් වේල්ස් ප්‍රාන්තයේ ගල්අඟුරු විදුලි උත්පාදන ඒකක 12න් හතරක් අක්‍රියව පැවති අතර, තවත් ඒකක දෙකක් අඩු ධාරිතාවකින් ක්‍රියාත්මක වී තිබුණි.

මෙවැනි පසුබිමක, වහල මත සූර්ය පැනල සහ නිවසේ විදුලි බැටරි සවි කර ඇති පිරිසට තමන් ගබඩා කරගත් අතිරික්ත විදුලිය ජාතික විදුලි ජාලයට අලෙවි කිරීමෙන් වැඩි ආදායමක් උපයා ගැනීමට අවස්තාව උදා වී තිබෙනවා.

Amber Electric සමාගමේ සම ප්‍රධාන විධායක නිලධාරී Dan Adams සඳහන් කර ඇත්තේ, එම සමාගමට සම්බන්ධ පාරිභෝගිකයන් 30,000ක් පමණ පැය දෙකක් ඇතුළත ඩොලර් මිලියන දෙකක පමණ ආදායමක් උපයාගත් බවයි.

ඒ අනුව, එක් පාරිභෝගිකයෙකුට සාමාන්‍යයෙන් ඩොලර් 69ක් පමණ ලැබී ඇති අතර, වැඩිම ආදායමක් උපයාගත් ඇතැම් පාරිභෝගිකයන් ඩොලර් 500කට වැඩි මුදලක් උපයාගෙන තිබෙන බවයි පැවසෙන්නේ.

මෙම සිදුවීමෙන් පැහැදිලි වන්නේ නිවසේ සවි කරන විදුලි බැටරි, විදුලි බිල්පත් අඩු කර ගැනීමට පමණක් නොව, සුදුසු වෙළෙඳපොළ තත්ත්වයන් යටතේ අමතර ආදායමක් උපයා ගැනීමට ද අවස්ථාව සලසන බවයි.