සෞදි අරාබියේ පවතින අවදානම් සහගත ආරක්ෂක තත්ත්වය හේතුවෙන් එරටට සිදු කිරීමට නියමිත සියලු සංචාර කල් දමන ලෙස ඔස්ට්‍රේලියානු රජය සිය පුරවැසියන්ට අනතුරු අඟවා තිබෙනවා.

ගුවන් තොටුපළ ඉලක්ක කරගත් මාරාන්තික මිසයිල ප්‍රහාර සහ කලාපීය ආරක්ෂක අවදානම් ඉහළ යාම මෙම අනතුරු ඇඟවීමට හේතු වී තිබෙන බවටයි සදහන් . යේමනයේ ඉරානයේ සහාය ලබන හූති සංවිධානයට සම්බන්ධ ප්‍රහාර හේතුවෙන් සෞදි අරාබියේ ගුවන් සේවා කටයුතුවලට දැඩි බාධා එල්ල වී ඇති බවයි වාර්තා වන්නේ.

ඔක්තෝබර් 16 වැනිදා යාවත්කාලීන කළ ඔස්ට්‍රේලියානු රජයේ Smartraveller සංචාරක උපදේශනයට අනුව, ආගමික කටයුතු සඳහා සිදු කරන සංචාර ද ඇතුළුව සෞදි අරාබියට යාමෙන් වළකින ලෙස උපදෙස් දී තිබෙනවා. එරට ගුවන් තොටුපළවලට ද නොයන ලෙසත්, තවදුරටත් ප්‍රහාර එල්ල වීම, ගුවන් අවකාශය වසා දැමීම, ගුවන් ගමන් අවලංගු වීම සහ ප්‍රමාද වීමේ අවදානමක් පවතින බවටයි අනතුරු අඟවා තිබෙන්නේ .

දැනටමත් සෞදි අරාබියේ සිටින ඔස්ට්‍රේලියානුවන්ට එරටින් පිටවීමට අවශ්‍ය නම්, ආරක්ෂිත තත්ත්වයන් පවතින අවස්ථාවලදී මාර්ග හෝ දුම්රිය ප්‍රවාහනය ඔස්සේ එක්සත් අරාබි එමීර් රාජ්‍යයේ හෝ කටාර් රාජ්‍යයේ ප්‍රධාන ගුවන් ප්‍රවාහන මධ්‍යස්ථාන වෙත ළඟා වීමේ විකල්ප සලකා බලන ලෙස දැනුම් දී තිබෙන බවටයි වාර්තා වන්නේ .

සෞදි අරාබියේ රැඳී සිටින පුද්ගලයන්ට හදිසි ආරක්ෂිත ස්ථානවලට යාමට සිදුවිය හැකි බැවින් අවශ්‍ය ආහාර, ජලය සහ අනෙකුත් අත්‍යවශ්‍ය ද්‍රව්‍ය සූදානම් කර තබා ගන්නා ලෙසත්, නිල නිවේදන නිරන්තරයෙන් පරීක්ෂා කරන ලෙසත් උපදෙස් ලබා දී තිබෙනවා. ගුවන් තොටුපළකට යාමට පෙර තම ගුවන් ගමන පිළිබඳව අදාළ ගුවන් සමාගමෙන් සෘජුවම තහවුරු කර ගැනීම ද වැදගත් බව සඳහන්.

කලාපයේ ආරක්ෂක තත්ත්වය ඕනෑම අවස්ථාවක වෙනස් විය හැකි බැවින්, සංචාරකයන් නිල උපදෙස් පිළිපදින ලෙසටයි ඔස්ට්‍රේලියානු රජය අවධාරණය කරන්නේ .