සිඩ්නි නුවර ජනප්‍රිය ඇවිදීමේ මංතීරු ආශ්‍රිතව කාන්තාවන්ට සහ දැරියන්ට ලිංගික හිරිහැර සිදුකළ බවට චෝදනා එල්ල වූ 13 හැවිරිදි පිරිමි ළමයෙකු පොලිසිය විසින් අත්අඩංගුවට ගෙන තිබෙනවා.

Sydney Northern Beaches ප්‍රදේශයේ Narrabeen ආශ්‍රිතව ඔක්තෝබර් 1 සිට 12 දක්වා කාලය තුළ සිදුවූ බව කියන සිද්ධීන් සම්බන්ධයෙන් මෙම විමර්ශන ආරම්භ කර තිබුණා.

පොලිසිය පවසන්නේ e-bike එකකින් පැමිණි පුද්ගලයෙකු ඇවිදීමේ මංතීරුවල සිටි කාන්තාවන්ගේ කැමැත්තකින් තොරව ඔවුන්ගේ සිරුරු ස්පර්ශ කර පලාගොස් ඇති බවට පැමිණිලි ලැබී තිබූ බවයි.

වයස අවුරුදු 13ත් 54ත් අතර කාන්තාවන් සහ දැරියන් සම්බන්ධයෙන් මෙවැනි සිද්ධීන් 11ක් පිළිබඳව චෝදනා ඉදිරිපත් වී තිබෙනවා.

පොලිසිය CCTV දර්ශන ප්‍රසිද්ධ කර මහජන සහාය ඉල්ලා සිටීමෙන් අනතුරුව අදාළ 13 හැවිරිදි පිරිමි ළමයා ඊයේ Mona Vale පොලිස් ස්ථානයට පැමිණ ඇති අතර, එහිදී ඔහු අත්අඩංගුවට ගෙන තිබෙනවා.

අනවසර ලිංගික ස්පර්ශ කිරීම් සම්බන්ධ චෝදනා 8ක් සහ පොදු ස්ථානවල අශෝභන ලෙස හැසිරීම සම්බන්ධ චෝදනා 3ක් ඔහුට එල්ල කර ඇති අතර, කොන්දේසි සහිත ඇප මත ඔහු මුදාහැර ඇති බව පොලිසිය තහවුරු කළා.

සැකකාර පිරිමි ළමයා නොවැම්බර් 4 වැනිදා ළමා අධිකරණයක් හමුවට ඉදිරිපත් කිරීමට නියමිතයි.