වික්ටෝරියා ප්‍රාන්තයේ නව නිවාස සහ ගොඩනැගිලි සඳහා පනවා ඇති ගෑස් භාවිත සීමාවන් තමන් බලයට පත්වුවහොත් දින 100ක් ඇතුළත ඉවත් කරන බව වික්ටෝරියා විපක්ෂ නායිකා Jess Wilson ප්‍රකාශ කර තිබෙනවා.

කම්කරු පක්ෂ රජයේ නව නීති අනුව 2027 ජනවාරි 1 වැනිදා සිට ඉදිකරන සියලුම නව නිවාස සහ බොහෝ වාණිජ ගොඩනැගිලි විදුලි බලයෙන් පමණක් ක්‍රියාත්මක වන ආකාරයට ඉදිකළ යුතුයි.

එමෙන්ම 2027 මාර්තු 1 වැනිදා සිට දැනට පවතින නිවාසවල ගෑස් ජල තාපකයක් අලුත්වැඩියා කළ නොහැකි තත්ත්වයට පත්වුවහොත්, එය වෙනුවට විදුලි ජල තාපකයක් සවි කළ යුතු බව නව නීතිවල සඳහන් වනවා.

වික්ටෝරියා විපක්ෂය පවසන්නේ මෙම නීති හේතුවෙන් නව නිවසක් ඉදිකිරීමේ පිරිවැය ඩොලර් 15,000කින් පමණ ඉහළ යා හැකි බවයි.

මේ අතර Australian Gas Infrastructure Group ආයතනය සිදුකළ ආර්ථික විශ්ලේෂණයකට අනුව, ගෑස් භාවිතය අඩුවීම හේතුවෙන් දැනට ගෑස් භාවිත කරන ඇතැම් නිවාසවල වාර්ෂික ගෑස් බෙදාහැරීමේ ගාස්තු ඩොලර් 142ත් 267ත් අතර ප්‍රමාණයකින් ඉහළ යා හැකි බවට ඇස්තමේන්තු කර තිබෙනවා.

කෙසේ වෙතත්, වික්ටෝරියා බලශක්ති අමාත්‍ය Jaclyn Symes පවසන්නේ මෙම ප්‍රතිපත්තියේ අරමුණ නිවාසවල බලශක්ති වියදම් අඩු කිරීම සහ කර්මාන්ත සඳහා අවශ්‍ය ගෑස් සැපයුම ආරක්ෂා කිරීම බවයි.

මේ අතර වික්ටෝරියා විපක්ෂය අවධාරණය කරන්නේ ගෑස් හෝ විදුලිය භාවිත කිරීම පිළිබඳ තීරණය නිවාස හිමියන්ට සහ ව්‍යාපාරිකයන්ට ලබාදිය යුතු බවයි.