One Nation පක්ෂය යෝජනා කර ඇති දැඩි සංක්‍රමණික සීමා කිරීම් ක්‍රියාත්මක කළහොත් ඉදිරි වසර 10 තුළ රටේ රාජ්‍ය ණය ප්‍රමාණය ඩොලර් බිලියන 275කින් පමණ ඉහළ යා හැකි බව නව ආර්ථික විශ්ලේෂණයකින් අනාවරණය වී තිබෙනවා.

Sydney Morning Herald වාර්තා කළ මෙම විශ්ලේෂණයට අනුව, Pauline Hansonගේ One Nation පක්ෂය යෝජනා කර ඇති වසර තුනක ඍණ ශුද්ධ සංක්‍රමණ ප්‍රතිපත්තිය හේතුවෙන් 2030 දශකයේ මැද භාගය වනවිට ඔස්ට්‍රේලියාවේ රැකියා නියුක්තිකයන් සංඛ්‍යාව 820,000කින් පමණ අඩුවිය හැකි බවට ඇස්තමේන්තු කර තිබෙනවා.

එමඟින් ආදායම් බදු, සමාගම් බදු සහ භාණ්ඩ හා සේවා බදු ආදායම් සැලකිය යුතු ලෙස අඩුවීමේ අවදානමක් පවතින බවයි පර්යේෂකයන් පෙන්වා දෙන්නේ.

වර්තමාන රජයේ ප්‍රතිපත්ති යටතේ ඉදිරි දශකයේදී ඔස්ට්‍රේලියාවේ සමස්ත රාජ්‍ය ණය ඩොලර් ට්‍රිලියන 1.4කට ආසන්න වනු ඇතැයි පුරෝකථනය කර ඇති අතර, One Nation සැලසුම යටතේ එය ඩොලර් ට්‍රිලියන 1.67ක් දක්වා ඉහළ යා හැකි බවද විශ්ලේෂණයේ සඳහන්.

මේ අතර සංක්‍රමණිකයන් සංඛ්‍යාව මුලින් වසරකට 100,000ක් දක්වා අඩු කර පසුව 160,000ක් දක්වා ඉහළ නැංවීමේ විපක්ෂ සන්ධාන සැලසුම යටතේද රැකියා නියුක්තිකයන් 430,000කින් පමණ අඩුවිය හැකි බවට ඇස්තමේන්තු කර තිබෙනවා.

කෙසේ වෙතත්, විපක්ෂ සන්ධානය පවසන්නේ තම සංක්‍රමණ ප්‍රතිපත්තිය ඔස්ට්‍රේලියාවට අවශ්‍ය නිපුණතා සහිත සේවකයන්ට ප්‍රමුඛත්වය ලබාදෙන අතර, එමඟින් ආර්ථිකයට ඇතිවිය හැකි අහිතකර බලපෑම් අවම කරගත හැකි බවයි.

One Nation පක්ෂය සංක්‍රමණිකයන් සීමා කිරීමෙන් නිවාස හිඟය, කුලී මිල ඉහළ යාම සහ යටිතල පහසුකම් මත පවතින පීඩනය අඩු කළ හැකි බවට තර්ක කරන අතර, පළමු වසර තුනෙන් පසු වාර්ෂික ශුද්ධ සංක්‍රමණය 130,000කට සීමා කිරීමට යෝජනා කර තිබෙනවා.

මෙම ආර්ථික විශ්ලේෂණයෙන් පෙන්වා දෙන්නේ සංක්‍රමණිකයන් විශාල වශයෙන් අඩු කිරීම රජයේ බදු ආදායමට සහ ශ්‍රම වෙළෙඳපොළට බලපෑම් ඇති කළ හැකි බවයි.

එහෙත් මෙම සංඛ්‍යා තහවුරු වූ අනාගත ප්‍රතිඵල නොව, යෝජිත ප්‍රතිපත්ති පදනම් කරගත් ආර්ථික පුරෝකථන බවද සඳහන් කළ යුතුයි.