වික්ටෝරියා ප්‍රාන්තයේ රියදුරන්ට සහන සැලසීමේ අරමුණින්, මාර්ග ගාස්තු සතියකට ඩොලර් 30කට සීමා කිරීමට Labour පක්ෂය පොරොන්දු වී තිබෙනවා.

එළඹෙන නොවැම්බර් 28 වැනිදා පැවැත්වීමට නියමිත වික්ටෝරියා ප්‍රාන්ත මැතිවරණය ඉලක්ක කරගනිමින් මෙම යෝජනාව ඉදිරිපත් කර ඇති බවයි පැවසෙන්නේ.

ලේබර් පක්ෂයේ සැලැස්මට අනුව, එම පක්ෂය මැතිවරණයෙන් ජයග්‍රහණය කළහොත් 2027 වසරේ ජනවාරි මාසයේ සිට වසරක කාලයක් සඳහා මෙම සහනය ක්‍රියාත්මක කිරීමට නියමිතයි.

මෙම යෝජනාව සඳහා ඩොලර් මිලියන 191ක මුදලක් වැය වනු ඇතැයි රජය ඇස්තමේන්තු කර තිබෙනවා අතර සුදුසුකම් ලබන රියදුරන්ට සහ කුඩා ව්‍යාපාරවලට වාහන සඳහා ගෙවන මාර්ග ගාස්තු වෙනුවෙන් මුදල් ආපසු ලබාගැනීමේ ක්‍රමයක් ද හඳුන්වාදීමට සැලසුම් කර තිබෙනවා.

එමෙන්ම විපක්ෂ නායිකා Jess Wilson නායකත්වයෙන් යුත් සන්ධානය, බලයට පත්වුවහොත් සතියකට ඩොලර් 50ක මාර්ග ගාස්තු සීමාවක් වසර දෙකක් සඳහා ක්‍රියාත්මක කිරීමට පොරොන්දු වී තිබෙනවා.

ඒ අනුව, ප්‍රධාන දේශපාලන පක්ෂ දෙකම ජීවන වියදම අඩු කිරීම සඳහා රියදුරන්ට සහන ලබාදීම කෙරෙහි අවධානය යොමු කර තිබීම විශේෂත්වයක්.

වික්ටෝරියා ප්‍රාන්තයේ ජීවන වියදම, නිවාස ඉදිකිරීම සහ බලශක්ති භාවිතය සම්බන්ධයෙන් මෙම ප්‍රතිපත්ති ඉදිරි මැතිවරණයේදී වැදගත් මාතෘකා බවට පත්ව තිබෙනවා.