ඡන්දය ප්‍රකාශ කිරීමේදී විශේෂ අවශ්‍යතා ඇති පුද්ගලයින්ට පහසුවෙන් සිය ඡන්දය ප්‍රකාශ කිරීමට හැකි වන පරිදි විශේෂ පහසුකම් වලින් යුක්ත මධ්‍යස්ථාන 88ක් ප්‍රාන්තය පුරා ස්ථාපිත කිරීමට Victoria ප්‍රාන්ත බලධාරීන් කටයුතු කරමින් සිටිනවා.

මෙම වැඩපිළිවෙළ යටතේ ස්නායු සංවර්ධන වෙනස්කම් සහිත පුද්ගලයන්ට, ඔටිසම් තත්ත්වය සහිත ඡන්දදායකයන්ට මෙන්ම ශබ්දයට හා ආලෝකයට සංවේදීතා දක්වන පුද්ගලයන්ට වඩාත් නිහඬ සහ පහසු පරිසරයකදී තම ඡන්දය ප්‍රකාශ කිරීමට අවස්ථාව ලැබෙනවා.

සාමාන්‍ය ඡන්ද මධ්‍යස්ථානවල පවතින ශබ්දය, ජනකාය සහ දීප්තිමත් ආලෝකය ඇතැම් පුද්ගලයන්ට දැඩි මානසික පීඩනයක් ඇති කළ හැකියි.

නව මධ්‍යස්ථානවලදී එවැනි උත්තේජන අවම කරමින්, නිහඬ පරිසරයක් සහ පහසුවෙන් ප්‍රවේශ විය හැකි පහසුකම් සැපයීමට සැලසුම් කර තිබෙනවා.

මෙම මධ්‍යස්ථාන පුහුණුව ලැබූ මැතිවරණ කාර්ය මණ්ඩලයක් යටතේ ක්‍රියාත්මක කිරීමට ද නියමිතයි.

වික්ටෝරියා ප්‍රාන්ත මැතිවරණ කොමිසමට අනුව, 2026 නොවැම්බර් 28 වැනිදා පැවැත්වීමට නියමිත ප්‍රාන්ත මැතිවරණයට පෙර, නොවැම්බර් 17 වැනිදා සිට මෙම විශේෂ ඡන්ද මධ්‍යස්ථාන 88 ක්‍රියාත්මක කිරීමට සැලසුම් කර තිබෙනවා.

සෑම පහළ මන්ත්‍රී මැතිවරණ කොට්ඨාසයකටම එක් විශේෂ මධ්‍යස්ථානයක් බැගින් පිහිටුවීමට නියමිතයි.

මෙම වැඩසටහන සාර්ථක වුවහොත්, ආබාධ සහිත සහ විශේෂ සංවේදීතා අවශ්‍යතා ඇති පුද්ගලයන්ට මැතිවරණ ක්‍රියාවලියට වඩාත් පහසුවෙන් සහභාගි වීමට අවස්ථාව සැලසෙනු ඇති.

මැතිවරණය යනු සෑම පුරවැසියෙකුටම තම අදහස ප්‍රකාශ කිරීමට ඇති වැදගත් ප්‍රජාතන්ත්‍රවාදී අයිතියක්. එම අයිතිය සියලු දෙනාටම සමානව භාවිත කළ හැකි පරිසරයක් නිර්මාණය කිරීම මෙම වැඩසටහනේ ප්‍රධාන අරමුණයි.