ස්වාධීන පාර්ලිමේන්තු මන්ත්‍රීනී Helen Haines, Victoria ප්‍රාන්තයේ Wangaratta ප්‍රදේශයේදී වාහනයක ගැටීමෙන් බරපතළ තුවාල ලබා රෝහල්ගත කර තිබෙනවා.

65 හැවිරිදි මන්ත්‍රීවරිය සිය මැතිවරණ කොට්ඨාස කාර්යාලය අසලදී මෙම සිදුවීමට මුහුණ දී ඇති අතර, ඇයගේ තත්ත්වය අසාධ්‍ය බව බලධාරීන් සඳහන් කර තිබෙනවා.

සිද්ධිය සම්බන්ධයෙන් 43 හැවිරිදි පුද්ගලයෙකු අත්අඩංගුවට ගෙන ඇති අතර, මෙය හිතාමතා සිදුකළ ප්‍රහාරයක්ද යන්න පිළිබඳව පොලිසිය විමර්ශන ආරම්භ කර තිබෙනවා.

ඔස්ට්‍රේලියානු ෆෙඩරල් පොලිසිය, වික්ටෝරියා පොලිසිය සහ ත්‍රස්ත විරෝධී විමර්ශන කණ්ඩායමද මේ සම්බන්ධයෙන් කටයුතු කරන බව වාර්තා වෙනවා.

පොලිසිය වැඩිදුරටත් සඳහන් කළේ තුවාල ලැබූ කාන්තාවගේ තත්ත්වය බරපතළ බවත්, අදාළ Toyota රථය තුළ තිබී පිහියක් සොයාගෙන පොලිස් භාරයට ගත් බවත්ය.

මෙය හිතාමතා සිදුකළ ක්‍රියාවක්ද යන්න පිළිබඳව මේ වන විට විමර්ශන සිදු කෙරෙනවා. රියදුරු සහ මන්ත්‍රීවරිය එකිනෙකා හඳුනන අයද යන්නත් මෙතෙක් තහවුරු වී නැහැ.

සිද්ධිය සම්බන්ධයෙන් වැඩිදුර විමර්ශන සඳහා වික්ටෝරියා පොලිසියේ ප්‍රධාන රථවාහන අනතුරු විමර්ශන ඒකකයේ නිලධාරීන් ද යොමු කර තිබෙනවා.

සිද්ධියට හේතුව මෙතෙක් තහවුරු වී නැහැ.

වාර්තා වන අන්දමට, මන්ත්‍රීවරිය කාර්යාලය ආසන්නයේ රථගාලක සිටියදී 4×4 වර්ගයේ වාහනයක ගැටී ඇති අතර, ඔස්ට්‍රේලියානු අග්‍රාමාත්‍ය  Anthony Albanese මෙම සිදුවීම “ප්‍රහාරයක්” ලෙස හඳුන්වා තිබෙනවා.