පුද්ගලයන්ගේ හැසිරීම් හෝ විශ්වාසයන් තුළ සිදුවන වෙනස්කම් හරහා ප්‍රචණ්ඩ අන්තවාදයට යොමුවීමේ අවදානම් හඳුනාගැනීම සඳහා ඔස්ට්‍රේලියානු රජය නව දැනුවත් කිරීමේ වැඩසටහනක් ආරම්භ කර තිබෙනවා.

මෙහි අරමුණ වන්නේ තමන්ට සමීප පුද්ගලයෙකුගේ හැසිරීමේ වෙනස්කම් පිළිබඳ කනස්සල්ලට පත්ව සිටින අයට අවශ්‍ය තොරතුරු සහ සහාය ලබාදීමයි.

ඒ සඳහා Step Together නමින් නොමිලේ ක්‍රියාත්මක වන ජාතික සහාය සේවාවක් හඳුන්වා දී ඇති අතර, එමඟින් පුද්ගලයන්ට තමන් දකින වෙනස්කම් වඩාත් හොඳින් තේරුම් ගැනීමට අවස්ථාව සැලසෙනවා.

යම් හැසිරීමක් වැඩි අවධානයක් යොමු කළ යුතු තත්ත්වයක්ද යන්න තේරුම් ගැනීමටත්, ඉදිරියේදී ගත හැකි ප්‍රායෝගික පියවර පිළිබඳ උපදෙස් ලබාගැනීමටත් මෙම සේවාවෙන් සහාය ලබාගත හැකියි.

කෙසේ වෙතත්, පුද්ගලයෙකුගේ හැසිරීමේ හෝ විශ්වාසයන්ගේ වෙනසක් පමණක් ප්‍රචණ්ඩ අන්තවාදයට යොමුවීමක් බව තීරණය කළ නොහැකි අතර, එවැනි වෙනස්කම් පිළිබඳව අවබෝධයෙන් සහ සැලකිල්ලෙන් කටයුතු කිරීම වැදගත්.

ගැටලුවක් පවතින බවට නිශ්චිතව තහවුරු කරගන්නා තුරු බලා සිටීම අවශ්‍ය නොවන බවත්, කනස්සල්ලක් ඇති විට තොරතුරු සහ සහාය ලබාගැනීම වැදගත් බවත් මෙම වැඩසටහන මඟින් අවධාරණය කරනවා.