ඔස්ට්‍රේලියාව සහ European Union අතර යෝජිත නිදහස් වෙළෙඳ ගිවිසුම සම්බන්ධයෙන් ඔස්ට්‍රේලියාවේ විපක්ෂ Coalition පක්ෂ සන්ධානය තුළ මතභේදයක් හටගෙන තිබෙනවා.

ඒ, Liberal Party විසින් ගිවිසුමට විරුද්ධ බවට තමන් ප්‍රකාශ කර තිබෙනවා යන Nationals නායක Matt Canavan ගේ ප්‍රකාශය සම්බන්ධයෙන් Liberal පක්ෂයේ ඇතැම් මන්ත්‍රීවරුන් විරෝධය පළ කිරීමත් සමඟයි.

Matt Canavan පෙන්වා දෙන්නේ, වෙළෙඳ අමාත්‍ය Don Farrell විසින් සාකච්ඡා අවසන් කළ මෙම ගිවිසුම ඔස්ට්‍රේලියාවේ දේශගුණික ප්‍රතිපත්ති සම්බන්ධ ස්වාධීනත්වයට බලපෑම් කළ හැකි බවයි.

එමෙන්ම, ඔස්ට්‍රේලියාවේ වානේ කර්මාන්තයට සහ ඇතැම් ගොවීන්ට ද මෙම ගිවිසුමෙන් අවාසි සිදුවිය හැකි බව ඔහුගේ අදහසයි.

කෙසේ වෙතත්, Liberal Party හි ඇතැම් සෙනෙට් සභිකයන් පෙන්වා දෙන්නේ, මෙම ගිවිසුමට සහාය දෙනවාද නැද්ද යන්න පිළිබඳව පක්ෂය තවමත් අවසන් තීරණයක් ගෙන නොමැති බවයි.

මාධ්‍ය වෙත අදහස් දක්වමින් Liberal සෙනෙට් සභිකයන් දෙදෙනෙකු පවසා ඇත්තේ, යෝජිත ගිවිසුම දැනට පවතින වෙළෙඳ තත්ත්වයට වඩා වාසිදායක විය හැකි බවයි.

එමෙන්ම, ජාත්‍යන්තර වෙළෙඳ ගැටුම් පවතින අවස්ථාවක European Union සමඟ සබඳතා ශක්තිමත් කර ගැනීමේ වැදගත්කම ද ඔවුන් පෙන්වා දී තිබෙනවා.

මේ අතර, ගිවිසුම නැවත සාකච්ඡා කර වෙනස් කළ යුතු බවට ඇතැම් පාර්ශ්ව අදහස් පළ කළත්, වෙළෙඳ අමාත්‍ය Don Farrell අවධාරණය කරන්නේ සාකච්ඡා අවසන් කර ඇති බැවින් ගිවිසුම නැවත විවෘත කිරීමට ඉඩක් නොමැති බවයි.

මෙම ගිවිසුම මඟින් ඔස්ට්‍රේලියාවේ beef සහ lamb මස් අපනයනකරුවන්ට යුරෝපා වෙළෙඳපොළට වැඩි ප්‍රවේශයක් හිමිවීමට නියමිතයි. එමෙන්ම, පලතුරු, එළවළු සහ seafood අපනයන සඳහා ද අවස්ථා පුළුල් කිරීමට යෝජනා වී තිබෙනවා.

කෙසේ වෙතත්, ඇතැම් ගොවි සංවිධාන අපේක්ෂා කළ තරම් වෙළෙඳපොළ ප්‍රවේශයක් මෙම ගිවිසුමෙන් නොලැබෙන බවට විවේචන ද ඉදිරිපත් කර තිබෙනවා.

Australian Chamber of Commerce and Industry ආයතනය මෙම ගිවිසුමට සහාය පළ කරමින් පෙන්වා දෙන්නේ, එය ඔස්ට්‍රේලියාවේ ජාතික ආර්ථික අවශ්‍යතා සඳහා වැදගත් අවස්ථාවක් බවයි.

ඉදිරි පියවර ලෙස, මෙම ගිවිසුම ලබන වසරේ මුල් භාගයේදී පාර්ලිමේන්තු ඒකාබද්ධ කමිටුවක් මඟින් සමාලෝචනය කිරීමට නියමිතයි.

ඒ අනුව, Australia–EU Free Trade Agreement සඳහා අවසන් පාර්ලිමේන්තු අනුමැතිය හිමිවේද යන්න ඉදිරියේදී තීරණය වනු ඇති.