ඔස්ට්‍රේලියාවේ ප්‍රධාන සුපිරි වෙළෙඳසැල් ජාලයක් වන Coles, කාන්තාවන්ගේ ආර්තවහරණය හෙවත් Menopause අවධියේදී ඇතිවන සෞඛ්‍ය අවශ්‍යතාවලට ගැළපෙන නිෂ්පාදන පහසුවෙන් හඳුනාගැනීම සඳහා නව ක්‍රමවේදයක් හඳුන්වාදීමට සූදානම් වනවා.

ඒ අනුව 2027 වසරේ මුල් භාගයේ සිට Coles වෙළෙඳසැල්වල තෝරාගත් නිෂ්පාදන සඳහා දම් පැහැති MTick සංකේතයක් ප්‍රදර්ශනය කිරීමටයි සැලසුම් කර ඇත්තේ.

GenM Collective ආයතනය සමඟ එක්ව ක්‍රියාත්මක කරන මෙම වැඩසටහන ඔස්ට්‍රේලියාවේ සුපිරි වෙළෙඳසැල් ක්ෂේත්‍රයට හඳුන්වාදෙන මෙවැනි ආකාරයේ පළමු වැඩපිළිවෙළයි.

වාර්තා අනුව ඔස්ට්‍රේලියාවේ කාන්තාවන් මිලියන 4.5ක් පමණ ආර්තවහරණය ආශ්‍රිත අවධීන් හරහා ගමන් කරන අතර, ඔවුන්ට ඇතිවන නින්දේ ගැටලු, සමේ වෙනස්කම්, ඇස් වියළීම සහ අවධානය යොමුකිරීමේ අපහසුතා වැනි තත්ත්වයන්ට අදාළ නිෂ්පාදන හඳුනාගැනීම මෙම වැඩසටහනේ අරමුණයි.

මෙම සංකේතය සමේ ආරක්ෂණ නිෂ්පාදන, පෞද්ගලික සනීපාරක්ෂක නිෂ්පාදන, විටමින් සහ වෙනත් සෞඛ්‍ය ආශ්‍රිත භාණ්ඩ සඳහා භාවිත කිරීමට නියමිත අතර, එම නිෂ්පාදන GenM ආයතනයේ සහතික කිරීමේ නිර්ණායක සපුරාලිය යුතුයි.

කෙසේ වෙතත්, MTick සංකේතය සහිත සෑම නිෂ්පාදනයක්ම ආර්තවහරණය ආශ්‍රිත රෝග ලක්ෂණ අඩුකරන බව සායනිකව සනාථ වී ඇති බවක් ඉන් අදහස් නොවන අතර, එය වෛද්‍ය උපදෙස් සඳහා ආදේශකයක් ද නොවන බව සඳහන්.

Coles සමාගම පවසන්නේ කාන්තාවන්ගේ සෞඛ්‍ය අවශ්‍යතා පිළිබඳ දැනුවත්භාවය වැඩි කිරීමත්, සුදුසු නිෂ්පාදන වෙළෙඳසැල්වලින් සහ අන්තර්ජාලය ඔස්සේ පහසුවෙන් සොයාගැනීමට අවස්ථාව සැලසීමත් මෙම වැඩපිළිවෙළේ ප්‍රධාන අරමුණු බවයි.

නව MTick ක්‍රමවේදය 2027 මුල් භාගයේදී හඳුන්වාදීමට සැලසුම් කර ඇති නමුත්, එය ක්‍රියාත්මක වන නිශ්චිත දිනය සහ සියලුම නිෂ්පාදන පිළිබඳ තොරතුරු මෙතෙක් ප්‍රකාශයට පත්කර නැහැ.