ඔස්ට්‍රේලියාවේ ගැබිනි කාන්තාවන් සහ දරුවන් රැකබලා ගන්නා දෙමාපියන් රැකියා ස්ථානවලදී වෙනස්කම්වලට මුහුණ දෙන බව නව වාර්තාවකින් හෙළි කර තිබෙනවා.

Australian Human Rights Commission නිකුත් කළ මෙම වාර්තාවට අනුව, ඇතැම් කාන්තාවන්ට ගැබ්ගැනීම හේතුවෙන් රැකියා අහිමිවීම, සේවා මුර අඩු කිරීම සහ උසස්වීම් අවස්ථා මඟහැරීම වැනි ගැටලුවලට මුහුණ දීමට සිදුව ඇති බව සඳහන්.

විශේෂයෙන්ම, ගැබිනි කාන්තාවන් සේවයෙන් ඉවත් කිරීම සාමාන්‍ය සේවක අඩු කිරීමක් ලෙස පෙන්වා දෙන අවස්ථා පිළිබඳවද වාර්තාව අවධානය යොමු කරනවා.

ගැබ්ගැනීම සම්බන්ධයෙන් Human Rights Commission වෙත ලැබුණු වෙනස්කම් පිළිබඳ පැමිණිලි සංඛ්‍යාව 2023 වසරේ 52 සිට 2025 වසරේ 71 දක්වා ඉහළ ගොස් ඇති බව වාර්තා වනවා.

මේ අතර, Sex Discrimination Commissioner Anna Cody පෙන්වා දෙන්නේ ගැබිනි කාන්තාවන් සහ දරුවන් රැකබලා ගන්නා දෙමාපියන්ගේ රැකියා අයිතිවාසිකම් තවදුරටත් ශක්තිමත් කළ යුතු බවයි.

ඒ සඳහා නම්‍යශීලී සේවා කොන්දේසි පුළුල් කිරීම සහ සේවා ස්ථානවල වෙනස්කම් වැළැක්වීම ඇතුළු නීතිමය සංශෝධන 18ක් වාර්තාවෙන් යෝජනා කර තිබෙනවා.

මෙම යෝජනා ක්‍රියාත්මක කිරීමෙන් ගැබිනි කාන්තාවන්ට සහ රැකබලා ගැනීමේ වගකීම් දරන සේවකයන්ට රැකියාව හා පවුල් ජීවිතය සමබර කරගැනීමට වඩා හොඳ අවස්ථාවක් සැලසෙනු ඇතැයි අපේක්ෂා කෙරෙනවා.