ඔස්ට්‍රේලියාවේ දේශපාලන, සමාජීය සහ ප්‍රජා කටයුතුවලට රහසිගතව බලපෑම් කිරීමට විදේශීය රාජ්‍යයන් දරන උත්සාහ පිළිබඳව එරට ෆෙඩරල් නීතිය ක්‍රියාත්මක කරන බලධාරීන් යළිත් අනතුරු අඟවා තිබෙනවා.

Australian Federal Police හෙවත් AFP පෙන්වා දෙන්නේ, මෙවැනි ක්‍රියාකාරකම් රටේ ජාතික ආරක්ෂාවට, ප්‍රජාතන්ත්‍රවාදී වටිනාකම්වලට සහ සමාජ එකමුතුවට තර්ජනයක් විය හැකි බවයි.

ඔස්ට්‍රේලියාවේ විදේශීය මැදිහත්වීම් සම්බන්ධ නීති යටතේ දෙවැනි පුද්ගලයාටත් වරදකරු වීමෙන් පසු සිරදඬුවම් නියම වීමත් සමඟ මෙම අනතුරු ඇඟවීම නිකුත් කර තිබෙනවා.

විශේෂයෙන්ම, ඔස්ට්‍රේලියාවේ ජීවත් වන විවිධ විදේශීය ප්‍රජාවන්ගේ සාමාජිකයන් බියගැන්වීම, බලපෑම් කිරීම සහ විදේශීය ආණ්ඩු විවේචනය කිරීම වැළැක්වීමට උත්සාහ කිරීම වැනි ක්‍රියා පිළිබඳව බලධාරීන්ගේ අවධානය යොමුව තිබෙනවා.

එවැනි මැදිහත්වීම් සාමාන්‍ය හා නීත්‍යනුකූල කටයුතු ලෙස පෙනී සිටිය හැකි බැවින් ඒවා හඳුනාගැනීම දුෂ්කර බවත් AFP සඳහන් කරනවා.

2018 වසරේ සිට මේ දක්වා අදාළ නීති යටතේ පුද්ගලයන් අට දෙනෙකුට චෝදනා ගොනු කර ඇති අතර, ඉන් දෙදෙනෙකු වරදකරුවන් වී තිබෙනවා.

විදේශීය පාර්ශ්වයන්ගෙන් සැකකටයුතු බලපෑම්, තර්ජන හෝ බලහත්කාරකම්වලට මුහුණ දෙන පුද්ගලයන්ට ඒ පිළිබඳව නිල ආරක්ෂක අංශ වෙත දැනුම් දෙන ලෙසත්, තහවුරු නොකළ චෝදනා සමාජ මාධ්‍ය ඔස්සේ ප්‍රසිද්ධ කිරීමෙන් වළකින ලෙසත් බලධාරීන් ඉල්ලා සිටිනවා.