ඔස්ට්‍රේලියාවේ ස්වාධීන පාර්ලිමේන්තු මන්ත්‍රී Helen Haines මෝටර් රථයකින් යටකර තුවාල සිදුකළ බවට සැකකෙරෙන පුද්ගලයා අල්ලා ගැනීමට මැදිහත් වූ කරණවෑමියෙකු (Barber) සිය අත්දැකීම මාධ්‍ය වෙත විස්තර කර තිබෙනවා.

වික්ටෝරියා ප්‍රාන්තයේ Wangaratta නගරයේ සිද්ධිය වූ ස්ථානය ආසන්නයේ barber shop එකක් පවත්වාගෙන යන Ricky Jefferies නමැති පුද්ගලයා මෙම සිද්ධියට මැදිහත් වී තිබෙනවා.

ඔහු පවසන්නේ සැකකරු මෝටර් රථයෙන් පිටතට ගෙන පරීක්ෂා කිරීමේදී ඔහුගේ සාක්කුවේ තිබී පිහියක් සොයාගත් බවයි.

සැකකරු එම පිහිය පිටතට නොගත් නමුත් ඔහුගේ හැසිරීම පිළිබඳ සැකයක් ඇතිවීම හේතුවෙන් එය සාක්කුවෙන් ඉවත් කර ඈතට විසි කළ බව Jefferies ප්‍රකාශ කර තිබෙනවා.

සිද්ධිය සිදුවන අවස්ථාවේ තවත් පුද්ගලයන් කිහිපදෙනෙකු ද තම ආරක්ෂාව ගැන නොසිතා මන්ත්‍රීවරිය බේරාගැනීමට ඉදිරිපත් වූ බව ඔහු සඳහන් කරනවා.

එක් පුද්ගලයෙකු මෝටර් රථයේ එන්ජිම ක්‍රියාත්මකව තිබියදීම, ඉදිරියට ගමන් කරමින් තිබූ රථය ඉදිරිපිට වාඩි වී මන්ත්‍රීවරියට උපකාර කිරීමට උත්සාහ කළ බවත් ඔහු පවසා තිබෙනවා.

කෙසේ වෙතත්, තමන් වීරයෙකු ලෙස හඳුන්වනවාට අකමැති බව පවසන Ricky Jefferies, ආරක්ෂිතව මැදිහත්වීමට අවස්ථාවක් ලැබුණු සාමාන්‍ය පුද්ගලයෙකු ලෙස තමන් ක්‍රියා කළ බවයි පවසා ඇත්තේ.

සිද්ධිය සම්බන්ධයෙන් පොලිස් විමර්ශන තවදුරටත් ක්‍රියාත්මකයි.