ඔස්ට්‍රේලියාවේ ස්වාධීන ෆෙඩරල් පාර්ලිමේන්තු මන්ත්‍රීවරියක වන Helen Hainesට  එල්ල වූ රීය ප්‍රහාරය සම්බන්ධයෙන් අත්අඩංගුවට ගත් පුද්ගලයාගේ සමාජ මාධ්‍ය ක්‍රියාකාරකම් පිළිබඳ තොරතුරු රැසක් අනාවරණය වී තිබෙනවා

Brendan Nugent නමැති 43 හැවිරිදි සැකකරු පසුගිය වසර කිහිපය තුළ X සමාජ මාධ්‍ය ජාලයේ පළකිරීම් 10,900කට අධික සංඛ්‍යාවක් සිදුකර ඇති බවයි වාර්තා වන්නේ.

වික්ටෝරියා ප්‍රාන්තයේ Wangaratta නගරයේ පිහිටි මන්ත්‍රීවරියගේ කාර්යාලය අසලදී ඊයේ පස්වරුවේ මෙම සිද්ධිය සිදුව ඇති අතර, ඉන් ඇයගේ පාදවලට බරපතළ තුවාල සිදුව තිබෙනවා.

අද නිකුත් වූ නවතම වාර්තා අනුව, මන්ත්‍රීවරියගේ එක් පාදයක් අහිමි වී ඇති අතර, ඇය බරපතළ නමුත් ස්ථාවර තත්ත්වයක පසුවන බව සඳහන්.

සැකකරුගේ සමාජ මාධ්‍ය ගිණුම පරීක්ෂා කිරීමේදී දේශගුණික විපර්යාස, වනාන්තර විනාශය, පරිසර ආරක්ෂාව සහ ඔස්ට්‍රේලියානු දේශපාලනය සම්බන්ධයෙන් ඔහු නිරන්තරයෙන් අදහස් පළකර ඇති බව අනාවරණය වී තිබෙනවා.

එමෙන්ම, මීට පෙර Helen Haines මන්ත්‍රීවරිය සමඟද සමාජ මාධ්‍ය ඔස්සේ අදහස් හුවමාරු කරගෙන ඇති ඔහු, ඇතැම් අවස්ථාවලදී ඇයගේ පරිසර ප්‍රතිපත්ති සම්බන්ධයෙන් ප්‍රසාදය පළකර තිබීම විශේෂත්වයක්.

සැකකරු මීට පෙර සමාජ මාධ්‍ය ඔස්සේ තම සෞඛ්‍ය ගැටලු, ආබාධිත දීමනා සහ ආර්ථික දුෂ්කරතා පිළිබඳවද අදහස් පළකර ඇති බව වාර්තා වනවා.

කෙසේ වෙතත්, මෙම ප්‍රහාරයට හේතුව මෙතෙක් තහවුරු වී නොමැති අතර, සැකකරුගේ සමාජ මාධ්‍ය අදහස් ප්‍රහාරයට සම්බන්ධ බවටද නිල නිගමනයක් ප්‍රකාශ කර නැහැ.

සිද්ධිය සම්බන්ධයෙන් ඔස්ට්‍රේලියානු ෆෙඩරල් පොලීසිය, වික්ටෝරියා පොලීසිය සහ ත්‍රස්ත මර්දන විමර්ශන ඒකකය ඇතුළු ආරක්ෂක අංශ පරීක්ෂණ පවත්වනවා.

මේ අතර අගමැති Anthony Albanese ද මෙම සිද්ධිය හිතාමතා සිදුකළ ක්‍රියාවක් ලෙස විස්තර කර තිබෙනවා.