මෙල්බන් නගරයේ පිහිටි ප්‍රාථමික පාසලක දරුවන්ට ලිංගික හා ශාරීරික අපයෝජන සිදුවූ බවට එල්ල වී ඇති චෝදනා සම්බන්ධයෙන් වික්ටෝරියා ප්‍රාන්තයේ අධ්‍යාපන බලධාරීන් විශේෂ පරීක්ෂණයක් ආරම්භ කර තිබෙනවා.

ඒ අනුව, අද Victorian Institute of Teaching (VIT) ආයතනයේ නිලධාරීන් Fitzroy Community Schoolහි North Fitzroy සහ Thornbury ප්‍රදේශවල පිහිටි පාසල් පරිශ්‍ර දෙකම පූර්ව දැනුම්දීමකින් තොරව පරීක්ෂාවට ලක්කර තිබෙනවා.

නිසි ලියාපදිංචියක් නොමැති ගුරුවරුන් සේවයේ යෙදවීමක් සිදුවන්නේද සහ දරුවන් අධීක්ෂණය සඳහා ප්‍රමාණවත් ගුරුවරුන් හා සේවකයන් සිටින්නේද යන්න මෙහිදී පරීක්ෂා කර ඇති බවයි වාර්තා වුණේ.

මෙම පාසලේ සිසුන්ට මීට පෙර ලිංගික හා ශාරීරික අපයෝජන සිදුවූ බවට එල්ල වී ඇති චෝදනා සම්බන්ධයෙන්ද විමර්ශන ක්‍රියාත්මක වන අතර, එම චෝදනාවලට අදාළව සහෝදරියන් දෙදෙනෙකු වික්ටෝරියා ශ්‍රේෂ්ඨාධිකරණය හමුවේ සිවිල් නඩුවක් ගොනුකර තිබෙනවා.

මේ අතර, පසුගිය අගෝස්තු මාසයේදී පාසලේ කාර්ය මණ්ඩල සාමාජිකයන් තිදෙනෙකු අධ්‍යාපන ක්ෂේත්‍රයේ බලතල සහිත තනතුරු දැරීමට නුසුදුසු බව බලධාරීන් තීරණය කර තිබූ අතර, පාසලේ සම නිර්මාතෘ Faye Berrymanගේ ගුරු ලියාපදිංචියද තාවකාලිකව අත්හිටුවනු ලැබුවා.

පාසලේ තවත් ගුරුවරයෙකුගේ ලියාපදිංචිය මීට පෙර අත්හිටුවා ඇති අතර, හිටපු විදුහල්පතිවරයෙකු ඇතුළු තවත් ගුරුවරුන් සම්බන්ධයෙන් විමර්ශන සිදුකෙරෙන බව සඳහන්.

2025 වසරේදී මෙම පාසල් පරිශ්‍ර දෙකෙහි සිසුන් 98 දෙනෙකු පමණ අධ්‍යාපනය ලබා තිබුණද, මෑතකදී පවුල් රැසක් දරුවන් පාසලෙන් ඉවත්කරගෙන ඇති බව වාර්තා වනවා.

කෙසේ වෙතත්, එල්ල වී ඇති සියලු චෝදනා අධිකරණය හමුවේ සනාථ වී නොමැති අතර, පාසල් පාලනාධිකාරිය පවසන්නේ අදාළ බලධාරීන් සමඟ විනිවිදභාවයෙන් කටයුතු කරමින් චෝදනා පිළිබඳ ස්වාධීන පරීක්ෂණයක් සිදුකරන බවයි.