ඔස්ට්‍රේලියාවේ ස්වාධීන ෆෙඩරල් පාර්ලිමේන්තු මන්ත්‍රී Helen Hainesට එල්ල වූ රිය ප්‍රහාරයෙන් ඇයගේ එක් පාදයක් අහිමි වී ඇති බව වාර්තා වනවා.

65 හැවිරිදි මන්ත්‍රීවරිය ඊයේ පස්වරුවේ වික්ටෝරියා ප්‍රාන්තයේ Wangaratta නගරයේ පිහිටි සිය කාර්යාලය ඉදිරිපිටදී මෙම ප්‍රහාරයට ලක්ව ඇති අතර, බරපතළ තුවාල හේතුවෙන් මෙල්බන්හි The Alfred රෝහල වෙත රැගෙන ගොස් හදිසි ශල්‍යකර්මයකට භාජනය කර තිබෙනවා.

වෛද්‍යවරුන්ට ඇයගේ එක් පාදයක් ශල්‍යකර්මයකින් ඉවත් කිරීමට සිදුව ඇති අතර, අනෙක් පාදය බේරාගැනීම සඳහාද දැඩි උත්සාහයක් දරමින් සිටින බවයි වාර්තා වන්නේ.

සිද්ධිය සම්බන්ධයෙන් අනාවරණය වී ඇති තොරතුරු අනුව, මෝටර්රථයක් මන්ත්‍රීවරිය අසලින් ගමන් කර නැවත හරවාගෙන පැමිණ ඇයගේ සිරුරේ ගැටී ඇති අතර, පසුව රථය පසුපසට ගෙන නැවතත් ඇය වෙත ධාවනය කර තිබෙනවා.

සිද්ධිය සම්බන්ධයෙන් Brendan Nugent නමැති 43 හැවිරිදි පුද්ගලයෙකු අත්අඩංගුවට ගෙන ඇති අතර, ඔස්ට්‍රේලියානු ෆෙඩරල් පොලිසිය සහ ත්‍රස්ත මර්දන විමර්ශන අංශ ඇතුළු ආරක්ෂක ආයතන පරීක්ෂණ සඳහා සම්බන්ධ වී තිබෙනවා.

අගමැති Anthony Albanese ද මෙම සිද්ධිය හිතාමතා සිදුකළ ක්‍රියාවක් බවට මූලික විමර්ශනවලින් පෙනී යන බව ප්‍රකාශ කර ඇති අතර, ප්‍රහාරයට නිශ්චිත හේතුව මෙතෙක් තහවුරු වී නැහැ.

මේ අතර, මන්ත්‍රීවරිය තවදුරටත් බරපතළ නමුත් ස්ථාවර තත්ත්වයක රෝහල්ගතව ප්‍රතිකාර ලබන බව වාර්තා වන අතර, ඇයගේ සුවය වෙනුවෙන් ඔස්ට්‍රේලියාව පුරා සහයෝගය පළවෙමින් පවතිනවා.