ඔස්ට්‍රේලියානුවන්ට දවසේ පැය 24 පුරා නොමිලේ සෞඛ්‍ය උපදෙස් ලබාගැනීමට හඳුන්වාදී ඇති 1800MEDICARE සේවාව මේ වනවිට මිලියනයකට අධික පිරිසක් භාවිත කර ඇති බව ෆෙඩරල් රජය පවසනවා.

මෙම සේවාව ඔස්සේ සතියේ දින හතේම ඕනෑම වේලාවක සුදුසුකම් ලත් හෙද නිලධාරියෙකු සමඟ දුරකථනයෙන් සම්බන්ධ වී සෞඛ්‍ය උපදෙස් ලබාගැනීමට අවස්ථාව හිමිවනවා.

රෝග ලක්ෂණ පිළිබඳ උපදෙස් ලබාගැනීම, වෛද්‍යවරයෙකු හමුවිය යුතුද යන්න තීරණය කිරීමට සහාය ලබාගැනීම සහ අවශ්‍ය සෞඛ්‍ය සේවා වෙත යොමුවීම සඳහා මෙම සේවාව භාවිත කළ හැකියි.

රෝහල්වල හදිසි ප්‍රතිකාර අංශ වෙත අනවශ්‍ය ලෙස පැමිණෙන රෝගීන්ගේ සංඛ්‍යාව අඩු කිරීම මෙම වැඩපිළිවෙළේ ප්‍රධාන අරමුණක් බවයි රජය සඳහන් කරන්නේ.

මෙම සේවාව භාවිත කරන සෑම දස දෙනෙකුගෙන් එක් අයෙකු පමණ හදිසි ප්‍රතිකාර අංශයට පැමිණීමෙන් හෝ හදිසි ඇමතුමක් ලබාදීමෙන් වැළැක්වීමට හැකිවූ බව රජයේ දත්ත පෙන්වා දෙනවා.

මෙහි විශේෂත්වය වන්නේ Medicare කාඩ්පතක් නොමැති පුද්ගලයන්ට, ජාත්‍යන්තර සිසුන්ට සහ ඔස්ට්‍රේලියාවට පැමිණ සිටින සංචාරකයන්ට ද නොමිලේ මෙම උපදේශන සේවාව ලබාගත හැකිවීමයි.

1800 633 422 දුරකථන අංකය ඇමතීමෙන් මෙම සේවාව ලබාගත හැකි අතර, 1800MEDICARE App එක සහ වෙබ් අඩවිය ඔස්සේ ද සෞඛ්‍ය තොරතුරු ලබාගත හැකියි.

කෙසේ වෙතත්, ජීවිතයට තර්ජනයක් ඇති හදිසි රෝගී තත්ත්වයකදී මෙම සේවාව වෙනුවට 000 හදිසි ඇමතුම් අංකය භාවිත කළ යුතු බව සෞඛ්‍ය බලධාරීන් අවධාරණය කරනවා.