ශ්‍රී ලන්කන් ගුවන් සේවය සිය ගුවන් ජාලය පර්ත් අගනුවර, චීනය හා අප්‍රිකාව දක්වා පුළුල් කිරීමේ අවස්ථා සොයා බලමින් සිටින බව එහි ප්‍රධාන විධායක නිලධාරී Vipul Misra මහතා පවසනවා

ශ්‍රී ලංකාවේ සංචාරක කර්මාන්තය වර්ධනය කිරීම සඳහා නව ගුවන් මාර්ග සංවර්ධනය කිරීමේදී ජාතික ගුවන් සේවය පෙරමුණ ගත යුතු බවද ඔහු සඳහන් කර තිබෙනවා.

සංචාරක අමාත්‍යාංශය සමඟ මෑතකදී පැවැත්වූ ප්‍රවර්ධන වැඩසටහනකින් පසු, පර්ත් වෙත ගුවන් ගමන් ආරම්භ කිරීම සඳහා හොඳ ඉල්ලුමක් සහ විභවයක් පවතින බව එම සමාගම හඳුනාගෙන තිබෙනවා.

එමෙන්ම චීනය සමඟ ගුවන් ගමන් නැවත ශක්තිමත් කිරීමත්, දිගු කලකට පෙර නතර කළ අප්‍රිකානු ගුවන් මාර්ග නැවත ආරම්භ කිරීමත් එම සමාගමේ අවධානයට ලක්ව තිබෙනවා.

මෙම නව ගුවන් මාර්ග ක්‍රියාත්මක කිරීම සඳහා අමතර ගුවන් යානා අවශ්‍ය වන අතර, ඒ සඳහා පිටතින් ගුවන් යානා ලබාගැනීමට සිදුවිය හැකි බවද ප්‍රධාන විධායක නිලධාරියා පවසනවා.

නව මාර්ගවල මුල් අවධියේදී ගුවන් යානා සම්පූර්ණ මගී ධාරිතාවයකින් ක්‍රියාත්මක නොවිය හැකි නමුත්, දිගුකාලීන සංචාරක වර්ධනය සඳහා එම මාර්ග සංවර්ධනය කිරීම වැදගත් බව ඔහු අවධාරණය කර තිබෙනවා.

කෙසේවෙතත්, පර්ත් සිට කොළඹ දක්වා සෘජු ගුවන් සේවාවක් ආරම්භ කරන නිශ්චිත දිනයක් හෝ අවසන් තීරණයක් මෙතෙක් ප්‍රකාශයට පත් කර නැහැ.