ඔස්ට්‍රේලියාව ඇතුළු රටවල් රැසක රජයේ වෙබ් අඩවි සහ අන්තර්ජාල සේවා, වෙබ් අඩවි සඳහා බහුලව භාවිත කරන PHP මෘදුකාංගයේ බරපතළ ආරක්ෂක දුර්වලතා හේතුවෙන් අවදානමකට ලක්ව තිබෙනවා.

ඔස්ට්‍රේලියාවේ Cyber Security ආයතනය වන Australian Signals Directorate හි වෙබ් අඩවිය ද බලපෑමට ලක්වූ වෙබ් අඩවි අතරට ඇතුළත්.

මෙම දුර්වලතා හරහා ආරක්ෂාව යාවත්කාලීන නොකළ පද්ධතිවලට අනවසරයෙන් ඇතුළු වී දත්ත හෝ පද්ධති පාලනයට ප්‍රවේශ වීමේ අවදානමක් පවතින බව විශේෂඥයන් අනතුරු අඟවනවා.

ඒ අනුව, නෙදර්ලන්තය සහ ෆින්ලන්තය ඇතුළු රටවල ඇතැම් රජයේ වෙබ් අඩවි හා සේවා, ආරක්ෂක පියවරක් ලෙස තාවකාලිකව අක්‍රිය කර තිබෙනවා.

PHP සංවර්ධකයන් මේ වන විට අදාළ දුර්වලතා නිවැරදි කිරීම සඳහා ආරක්ෂක යාවත්කාලීන නිකුත් කර ඇති අතර, බලපෑමට ලක්විය හැකි පද්ධති වහාම යාවත්කාලීන කරන ලෙස උපදෙස් දී තිබෙනවා.

ඔස්ට්‍රේලියානු Cyber Security Centre ආයතනය ද PHP භාවිත කරන ආයතනවලට තම පද්ධති පරීක්ෂා කර අවශ්‍ය ආරක්ෂක යාවත්කාලීන යෙදීමට සූදානම් වන ලෙස දැනුම් දී තිබෙනවා.

කෙසේ වෙතත්, ඔස්ට්‍රේලියානු බලධාරීන් මේ දක්වා මෙම දුර්වලතා සම්බන්ධ සක්‍රීය ප්‍රහාර සිදුවන බවට තහවුරු කර නොමැති අතර, ආරක්ෂක පියවරක් ලෙස අවදානම අවම කිරීමට කටයුතු කරමින් සිටිනවා.