ඔස්ට්‍රේලියාවේ Melbourne නගරය 2027 වසරේ ලෝකයේ සංචාරය කිරීමට සුදුසුම ගමනාන්ත 25 අතරට National Geographic විසින් නම් කර තිබෙනවා.

ලොව පුරා සංචාරක ගමනාන්ත හඳුන්වා දෙන එම සඟරාවේ වාර්ෂික Best of the World 2027 ලැයිස්තුවට ඇතුළත් වූ එකම ඔස්ට්‍රේලියානු ගමනාන්තය වන්නේ Melbourne නගරයයි.

නගරයේ සජීවී කලා සංස්කෘතිය, විවිධ රටවල ආහාර වර්ග රසවිඳිය හැකි අවන්හල් සහ අනන්‍යතාවයෙන් යුත් ප්‍රදේශ මෙම තේරීමට ප්‍රධාන වශයෙන් බලපා තිබෙනවා.

විශේෂයෙන්ම Smith Street සහ Queen Victoria Market වැනි ස්ථාන සංචාරකයන්ට විවිධ සංස්කෘතීන් සහ ආහාර අත්දැකීම් සමීප කරවන බව National Geographic පෙන්වා දෙනවා.

මීට අමතරව, නගරයේ හරිත පරිසරය වැඩිදියුණු කිරීමේ නව සැලසුම් සහ ප්‍රසිද්ධ ක්‍රීඩා ඉසව් පැවැත්වීමේ හැකියාවත් Melbourne නගරයේ ආකර්ෂණය ඉහළ නංවා තිබෙනවා.

2027 වසරේ Rugby World Cup තරග අටක් Melbourne හි Docklands ප්‍රදේශයේ පැවැත්වීමට නියමිත වීමත් නගරයට ජාත්‍යන්තර අවධානයක් ලැබීමට තවත් හේතුවක්.

එමෙන්ම Twelve Apostles සහ Phillip Island වැනි Victoria ප්‍රාන්තයේ ජනප්‍රිය සංචාරක ස්ථාන ද ඇතුළත් කරමින් Great Victorian Bathing Trail සංචාරක මාර්ගය පුළුල් කිරීමට සැලසුම් කර තිබෙනවා.