දකුණු පැසිෆික් සාගරයේ පිහිටි වනුවාටු දූපත් රාජ්‍යය ආසන්නයේ අද ප්‍රබල භූ කම්පන දෙකක් සිදුව තිබෙනවා.

පළමු භූ කම්පනය රික්ටර් මාපකයේ ඒකක 6.9ක ප්‍රබලත්වයකින් සටහන් වී ඇති අතර, එය වනුවාටුහි සෝලා ප්‍රදේශයට කිලෝමීටර් 200ක් පමණ බටහිර දෙසින් සිදුව ඇති බවයි ඇමෙරිකානු භූ විද්‍යා සමීක්ෂණ ආයතනය සඳහන් කරන්නේ.

ඉන් විනාඩි 5කට පමණ පසු රික්ටර් මාපකයේ ඒකක 6.3ක තවත් භූ කම්පනයක් සිදුව තිබෙනවා.

පළමු භූ කම්පනය පොළොව මතුපිට සිට කිලෝමීටර් 10ක ගැඹුරකින් සිදුව ඇති අතර, එහි ප්‍රබලත්වය මුලින් ඒකක 7.2ක් ලෙස සටහන් කර පසුව 6.9ක් දක්වා සංශෝධනය කර තිබෙනවා.

භූ කම්පනයේ කේන්ද්‍රයේ සිට කිලෝමීටර් 300ක් ඇතුළත වෙරළබඩ ප්‍රදේශවලට අනතුරුදායක සුනාමි රළ ඇතිවිය හැකි බවට පැසිෆික් සුනාමි අනතුරු ඇඟවීමේ මධ්‍යස්ථානය මුලින් අනතුරු අඟවා තිබුණා.

කෙසේ වෙතත්, නවතම දත්ත අනුව සුනාමි අවදානම පහව ගොස් ඇති බව තහවුරු කරමින් එම අනතුරු ඇඟවීම පසුව ඉවත් කිරීමට බලධාරීන් පියවර ගෙන තිබෙනවා.

මේ අතර, මෙම භූ කම්පන හේතුවෙන් ඔස්ට්‍රේලියාවට සුනාමි අවදානමක් නොමැති බව කාලගුණ විද්‍යා කාර්යාංශය සඳහන් කළා.