වික්ටෝරියා ප්‍රාන්තයේ වෙළෙඳසැලක ශීතකරණයක් තුළ වසර 30කට ආසන්න කාලයක් පැරණි අයිස්ක්‍රීම් එකක් හමුවීමේ අපූරු පුවතක් වාර්තා වනවා.

වික්ටෝරියාවේ නිරිතදිග පිහිටි Harrow නගරයේ Kolmar House General Storeහි හිමිකරු වන Ash Stanbridge විසින් මෙම අයිස්ක්‍රීම් එක සොයාගෙන තිබෙනවා.

ඔහු සිය වෙළෙඳසැලේ පැරණි ශීතකරණයක් පිරිසිදු කරමින් සිටියදී අයිස් තට්ටු යට සැඟවී තිබූ 1990 දශකයේ අවසාන කාලයට අයත් Magnum Ego අයිස්ක්‍රීම් එක මෙලෙස හමුවී තිබෙනවා.

1998 වසරේදී වෙළෙඳපොළට හඳුන්වා දුන් මෙම අයිස්ක්‍රීම් වර්ගය ඔස්ට්‍රේලියානුවන් අතර ඉතා ජනප්‍රිය වූ අතර, මෙම වසරේ මුල් භාගයේදී එහි නිෂ්පාදනය නතර කර තිබුණා.

වසර ගණනාවක් ගතවී තිබුණද අයිස්ක්‍රීම් එක තවමත් නොදියවී, එහි මුල් ඇසුරුම සමඟම පැවතීම තමන් පුදුමයට පත් කළ බවයි වෙළෙඳසල් හිමිකරු සඳහන් කරන්නේ.

මෙම සොයාගැනීම social media ඔස්සේ පළ කිරීමත් සමඟ විශාල අවධානයක් දිනාගෙන ඇති අතර, බොහෝ ඔස්ට්‍රේලියානුවන් තම ළමා කාලයේ Magnum Ego අයිස්ක්‍රීම් සමඟ බැඳුණු මතකයන් බෙදාගෙන තිබෙනවා.

මේ අතර, වසර 145කට අධික ඉතිහාසයක් ඇති මෙම වෙළෙඳසැලෙන් 1980 සහ 1990 දශකවලට අයත් පැරණි ආහාර ඇසුරුම් ඇතුළු තවත් භාණ්ඩ රැසක් හමුවී ඇති අතර, අදාළ අයිස්ක්‍රීම් එක සොයාගැනීම පිළිබඳ Magnum සමාගම ද අවධානය යොමුකර තිබෙනවා.