ඔස්ට්‍රේලියානු කාන්තා ක්‍රිකට් කණ්ඩායමේ ප්‍රබල වේගපන්දු යවන්නියක වන Megan Schuttට ඖෂධ භාවිතය සම්බන්ධ නීති උල්ලංඝනය කිරීම හේතුවෙන් තරග දෙකක තහනමක් පැනවීමට Cricket Australia ආයතනය පියවර ගෙන තිබෙනවා.

ඇයට මෙම තහනම පනවා ඇත්තේ වෛද්‍ය නිර්දේශ මත ලබාගන්නා ඖෂධ භාවිතයේදී අනුගමනය කළ යුතු ක්‍රීඩා වෛද්‍ය විද්‍යා මාර්ගෝපදේශ නිසි ලෙස පිළිපැදීමට අපොහොසත් වීම හේතුවෙන්.

කෙසේ වෙතත්, අදාළ සිදුවීම තරග පැවැත්වෙන කාලසීමාවෙන් පිටත සිදුවූ එක් සිදුවීමක් පමණක් බවත්, ක්‍රීඩා දක්ෂතා ඉහළ නැංවීමේ අරමුණින් ඖෂධ භාවිත කර නොමැති බවත් Cricket Australia ආයතනය අවධාරණය කර තිබෙනවා.

මෙම තහනම ජාත්‍යන්තර සහ දේශීය ක්‍රිකට් තරග සඳහා අදාළ වන අතර, ඒ අනුව අද පැවති නවසීලන්තයට එරෙහි තුන්වන සහ අවසන් විස්සයි විස්ස තරගය ද ඇයට අහිමි වුණා.

එමෙන්ම, ඔක්තෝබර් 31 වැනිදා Melbourne Stars කණ්ඩායමට එරෙහිව පැවැත්වෙන Adelaide Strikers කණ්ඩායමේ කාන්තා WBBL ආරම්භක තරගයට ද ඇයට සහභාගි වීමට නොහැකි වනවා.

මේ අතර Megan Schutt ප්‍රකාශ කර ඇත්තේ තමන් සිදුකළ වරද පිළිගන්නා අතර, ක්‍රීඩිකාවක ලෙස පිළිපැදිය යුතු වගකීම් නිසි ලෙස ඉටු නොකිරීම සම්බන්ධයෙන් සමාව ඉල්ලා සිටින බවයි.