Victoria ප්‍රාන්තයේ නිවාස ඉදිකිරීමේදී ගැටලුවලට මුහුණ දෙන ජනතාවට නොමිලේ නීතිමය සහාය ලබාදීමේ වැඩපිළිවෙළ පුළුල් කිරීමට රජය පියවර ගෙන තිබෙනවා.

මේ සඳහා ඉදිරි වසර පහ තුළ ඩොලර් මිලියන 14.5කට වැඩි මුදලක් ආයෝජනය කිරීමට සැලසුම් කර ඇති බව සඳහන්.

නව වැඩපිළිවෙළ යටතේ නිවාස ඉදිකිරීමේ ඕනෑම අදියරකදී ඇතිවන ගැටලු සඳහා උපදෙස් ලබාගැනීමට නිවාස හිමියන්ට අවස්ථාව සැලසෙනවා.

ඉදිකිරීම් ප්‍රමාද, නිවාසවල දෝෂ සහ ඉදිකිරීම් සමාගම් සමඟ ඇතිවන ගිවිසුම් ආරවුල් සම්බන්ධයෙන් අවශ්‍ය මඟපෙන්වීමද මෙයට ඇතුළත්.

සරල ගැටලු විසඳා ගැනීමට මාර්ගගත තොරතුරු සහ ස්වයං උපකාරක සේවා ලබාදෙන අතර, අවශ්‍ය පුද්ගලයන්ට නීතිමය උපදෙස්ද හිමිවනු ඇති.

සංකීර්ණ ගැටලු ඇති නිවාස හිමියන් වෙනුවෙන් නීතිමය නියෝජනය සහ සෘජු සහාය ලබාදීමේ පහසුකම්ද පුළුල් කිරීමට නියමිතයි.

මෙම වැඩපිළිවෙළ මඟින් වසරකට නිවාස හිමියන් 400කට පමණ ගැඹුරු නීතිමය සහාය ලබාදීමට අපේක්ෂා කරන අතර, ඉදිකිරීම් ගැටලුවලට මුහුණ දෙන පවුල්වල අයිතිවාසිකම් ආරක්ෂා කිරීම මෙහි ප්‍රධාන අරමුණයි.