වික්ටෝරියා ප්‍රාන්තයේ පාසල් ගුරුවරුන්ගේ සංඛ්‍යාව සැලකිය යුතු ලෙස ඉහළ ගොස් ඇති අතර, 2024 සිට 2025 දක්වා කාලය තුළ ලියාපදිංචි පාසල් ගුරුවරුන්ගේ සංඛ්‍යාව 2,000කට ආසන්න ප්‍රමාණයකින් වැඩි වී ඇති බව ප්‍රාන්ත රජය නිවේදනය කර තිබෙනවා.

ඊයේ නිකුත් කළ 2025 Teacher Workforce Snapshot වාර්තාවට අනුව, 2031 වසර වනවිට වික්ටෝරියා ප්‍රාන්තයේ පාසල් සහ පෙරපාසල්වල ඉගැන්වීමට සූදානම්ව සිටිය හැකි ගුරුවරුන්ගේ සංඛ්‍යාව 127,000 ඉක්මවනු ඇති බවටයි ඇස්තමේන්තු කර ඇත්තේ.

එමෙන්ම, 2025 වසරට සාපේක්ෂව 2031 වනවිට ගුරු සේවයට ලබාගත හැකි ගුරුවරුන්ගේ සංඛ්‍යාව 15,700කින් පමණ ඉහළ යා හැකි බවද එම වාර්තාවෙන් පුරෝකථනය කර තිබෙනවා.

විශේෂයෙන් මුල් ළමාවිය අධ්‍යාපන ක්ෂේත්‍රයේ පූර්ණ ලියාපදිංචිය සහිත ගුරුවරුන්ගේ සංඛ්‍යාව වසරක් තුළ සියයට 12කින් ඉහළ ගොස් ඇති බවද අනාවරණය වී තිබෙනවා.

වික්ටෝරියා ප්‍රාන්ත රජය පවසන්නේ 2020 වසරේ සිට ගුරු සේවයේ වර්ධනය සඳහා ඔස්ට්‍රේලියානු ඩොලර් බිලියන 1.9කට අධික මුදලක් ආයෝජනය කර ඇති අතර, 2027 වසරේදී Career Start වැඩසටහන යටතේ තවත් නවක ගුරුවරුන් 2,500කට සහාය ලබාදීමට සැලසුම් කර ඇති බවයි.

එමෙන්ම, ගුරු හිඟයක් පවතින ප්‍රාදේශීය පාසල් සඳහා ගුරුවරුන් ආකර්ෂණය කරගැනීමට වැටුප් සහිත පුහුණු අවස්ථා, රැකියාව සමඟ අධ්‍යාපන උපාධි හැදෑරීමේ වැඩසටහන් සහ විශේෂ දිරිගැන්වීම් ක්‍රියාත්මක කිරීමට ද රජය අවධානය යොමුකර තිබෙනවා.

කෙසේ වෙතත්, වික්ටෝරියා ප්‍රාන්තයේ පාසල් සිසුන්ගේ සංඛ්‍යාවද ඉහළ යමින් පවතින බැවින්, අනාගතයේදී අවශ්‍ය ප්‍රදේශවලට ප්‍රමාණවත් ගුරුවරුන් ලබාදීම තවදුරටත් අභියෝගයක් වනු ඇති බව ද රජය පිළිගෙන තිබෙනවා.