ඔස්ට්‍රේලියාවේ අපරාධ සහ බරපතළ විෂමාචාර සම්බන්ධයෙන් වීසා ප්‍රතික්ෂේප කිරීමේ සහ අවලංගු කිරීමේ තීරණ සඳහා බලපාන නව නීතිමය උපදෙස් මාලාවක් ලබන ඔක්තෝබර් 31 වැනිදා සිට ක්‍රියාත්මක වීමට නියමිතයි.

ස්වදේශ කටයුතු අමාත්‍ය ටෝනි බර්ක් විසින් සැප්තැම්බර් 18 වැනිදා අත්සන් කරන ලද Ministerial Direction 123 යටතේ දැනට ක්‍රියාත්මක Direction 110 වෙනුවට නව ක්‍රමවේදයක් හඳුන්වා දෙනවා.

මෙහි ප්‍රධාන වෙනස වන්නේ වීසා සම්බන්ධයෙන් පුද්ගලයෙකුගේ චරිතය සහ හැසිරීම ඇගයීමේදී, ඔහු හෝ ඇය ඔස්ට්‍රේලියාවේ කොපමණ කාලයක් ජීවත්ව තිබේද සහ මෙරට පවුල් සබඳතා කොතරම් ශක්තිමත්ද යන කරුණුවලට පෙරට වඩා අඩු ප්‍රමුඛතාවක් හිමිවීමයි.

ඒ වෙනුවට ඔස්ට්‍රේලියානු ජනතාවගේ ආරක්ෂාව, ගෘහස්ථ සහ පවුල් ප්‍රචණ්ඩත්වය, සමාජයේ අපේක්ෂාවන් සහ දරුවන්ගේ යහපත යන කරුණු හතරට වැඩි ප්‍රමුඛතාවක් ලබාදීමට නියමිතයි.

මේ අනුව බරපතළ අපරාධ වාර්තා ඇති, පවුල් ප්‍රචණ්ඩත්වයට සම්බන්ධ වූ හෝ මහජන ආරක්ෂාවට තර්ජනයක් විය හැකි පුද්ගලයන්ගේ වීසා ප්‍රතික්ෂේප කිරීමේ සහ අවලංගු කිරීමේ තීරණවලට මෙම වෙනස්කම් සැලකිය යුතු බලපෑමක් ඇති කළ හැකියි.

විශේෂයෙන් වසර ගණනාවක් ඔස්ට්‍රේලියාවේ ජීවත්වීම හෝ පවුලේ සාමාජිකයන් සිටීම පමණක් වීසා අවලංගු කිරීමේ තීරණයකින් ආරක්ෂා වීමට ප්‍රමාණවත් නොවිය හැකි බව නීති විශේෂඥයන් පෙන්වා දෙනවා.

කෙසේ වෙතත්, මෙම නව උපදෙස් සියලුම වීසා හිමියන්ට පොදුවේ වීසා අවලංගු කරන නීතියක් නොවන අතර, සංක්‍රමණ පනතේ 501 වගන්තිය යටතේ චරිතය සහ හැසිරීම සම්බන්ධයෙන් ගනු ලබන වීසා තීරණ සඳහා පමණක් අදාළ වන බව අවධාරණය කෙරෙනවා.