ඔස්ට්‍රේලියානු රජය හඳුන්වා දුන් නව Student Visa නීති හේතුවෙන් ජාත්‍යන්තර සිසුන් රැසක් දැඩි අවිනිශ්චිතතාවකට සහ මානසික පීඩනයකට මුහුණ දී සිටින බව විශේෂ මාධ්‍ය වාර්තාවකින් අනාවරණය වී තිබෙනවා.

ඔක්තෝබර් 2 වැනිදා සිට ක්‍රියාත්මක වූ නව නීති අනුව, බොහෝ තාවකාලික වීසා හිමියන්ට ඔස්ට්‍රේලියාව තුළ සිට නව Student Visa සඳහා අයදුම් කිරීමට නොහැකි වන අතර ඒ සඳහා රටින් පිටතට යාමට සිදුවනවා.

ඇතැම් සිසුන්ට සිය අධ්‍යාපන කටයුතු අවසන් වීමට පෙර වීසා කාලසීමාව අවසන් වීමේ ගැටලුවට මුහුණ දීමට සිදුව ඇති බව ද වාර්තා වනවා.

එමෙන්ම නව නීති යටතේ බොහෝ Student Visa අයදුම්කරුවන්ට තම සැමියා, බිරිඳ හෝ දරුවන් වීසා අයදුම්පතට ඇතුළත් කිරීමට නොහැකි වන අතර ආචාර්ය උපාධි සිසුන් ඇතුළු ඇතැම් කණ්ඩායම් සඳහා පමණක් විශේෂ Exceptions ලබාදී තිබෙනවා.

මේ හේතුවෙන් ඇතැම් ජාත්‍යන්තර සිසුන්ට තම පවුල්වලින් වෙන්ව ජීවත් වීමට සිදුවීම සහ අධ්‍යාපන කටයුතු අතරමඟ නතර වීමේ අවදානමක් මතුව ඇති බවයි අදාළ වාර්තාව පෙන්වා දෙන්නේ.

කෙසේ වෙතත්, ඔස්ට්‍රේලියානු රජය පවසන්නේ Student Visa ක්‍රමය අනිසි ලෙස භාවිත කිරීම වැළැක්වීම සහ සැබෑ අධ්‍යාපන අරමුණු සඳහා පැමිණෙන සිසුන් ආරක්ෂා කිරීම මෙම නව නීතිවල අරමුණ බවයි.

මේ අතර දැනට වලංගු Student Visa සඳහා නව නීති සෘජුව බල නොපාන අතර, ඔස්ට්‍රේලියාවේ අධ්‍යාපනය ලබන සහ ඉදිරියේදී පැමිණීමට බලාපොරොත්තු වන සිසුන් සිය වීසා තත්ත්වය හා නව කොන්දේසි පිළිබඳව විශේෂ අවධානයක් යොමු කළ යුතු බව බලධාරීන් දැනුම් දෙනවා.