ඔස්ට්‍රේලියාවේ වසර 50කට වැඩි කාලයකට පසු ඉදිකළ පළමු නව ජාත්‍යන්තර ගුවන් තොටුපළ වන Western Sydney International Airport (Nancy-Bird Walton Airport) ඔක්තෝබර් 25 ඉරිදා සිට මගී ගුවන් ගමන් ආරම්භ කිරීමට නියමිතයි.

මෙම ගුවන් තොටුපළ Sydney CBD සිට කිලෝමීටර් 45ක් පමණ දුරින්, Luddenham සහ Badgerys Creek ආසන්නයේ පිහිටා තිබෙනවා.

මෙහි විශේෂත්වය වන්නේ පැය 24 පුරා ගුවන් ගමන් ක්‍රියාත්මක කළ හැකි වීමයි. Kingsford Smith Airport හි රාත්‍රී 11 සිට උදේ 6 දක්වා ගුවන් ගමන් සීමාවක් පවතින නමුත්, මෙම නව ගුවන් තොටුපළට එවැනි සීමාවක් නැහැ.

මේ වනවිට ගුවන් සමාගම් 7ක් මෙහි සේවා ආරම්භ කිරීමට එකඟ වී තිබෙනවා.

Air New Zealand විසින් Auckland වෙත ඔක්තෝබර් 26 සිටත්,

Singapore Airlines විසින් Singapore වෙත නොවැම්බර් 23 සිටත්,

Qatar Airways විසින් Doha වෙත දෙසැම්බර් 15 සිටත් ගුවන් ගමන් ආරම්භ කිරීමට නියමිතයි.

එමෙන්ම Fiji Airways විසින් Nadi වෙතත්,

Vietjet විසින් Ho Chi Minh City සහ Bangkok වෙතත් ගුවන් සේවා සැලසුම් කර තිබෙනවා. Qantas සහ Jetstar විසින් ද දේශීය ගුවන් ගමන් ක්‍රියාත්මක කිරීමට නියමිතයි.

Emirates සමාගමටද සතියකට ගුවන් ගමන් 7ක් සඳහා අවසර ලැබී ඇති නමුත්, එහි කාලසටහන තවමත් ප්‍රකාශයට පත් කර නැහැ.

Sydney Metro දුම්රිය සේවාව තවමත් සෘජුව ගුවන් තොටුපළට සම්බන්ධ කර නොමැති නිසා මුල් කාලයේදී මගීන්ට St Marys දක්වා නොමිලේ shuttle bus සේවාවක් භාවිත කිරීමට සිදුවනු ඇති අතර, ඒ සමඟ සාමාන්‍ය බස්, කුලී රථ සහ Rideshare සේවාද ලබාගත හැකි වෙනවා.

මෙම ගුවන් තොටුපළේ වාහන නැවැත්වීම සඳහා ස්ථාන 6,000ක් පමණ ද සකස් කර තිබෙනවා.

මුල් අදියරේදී වසරකට මගීන් මිලියන 10ක් පමණ හසුරුවා ගැනීමට හැකි අතර, අනාගතයේදී එම ධාරිතාව මිලියන 82 දක්වා වැඩි කිරීමට හැකි බව පාලනාධිකාරිය පවසනවා.