ඔස්ට්‍රේලියාවේ ප්‍රධාන බැංකු කිහිපයක් සේවක සංඛ්‍යාව අඩු කිරීමට පියවර ගැනීමත් සමඟ බැංකු ක්ෂේත්‍රයේ රැකියා සුරක්ෂිතභාවය පිළිබඳ දැඩි අවධානයක් යොමු වී තිබෙනවා.

Westpac බැංකුව මෙම මාසය තුළ රැකියා 250ක් පමණ කප්පාදු කිරීමට සැලසුම් කර ඇති අතර, ඉන් රැකියා 140ක් පමණ මෙම සතියේදී අහිමි වන බවයි වාර්තා වන්නේ.

මීට අමතරව National Australia Bank හෙවත් NAB බැංකුව ද අභියෝගාත්මක ආර්ථික තත්ත්වයන් හමුවේ රැකියා 2,500ක් කප්පාදු කිරීමට සැලසුම් කර ඇති අතර, ඉන් රැකියා 1,500ක් මෙම වසර අවසන් වීමට පෙර අහිමි කිරීමට නියමිතයි.

මේ අතර, ANZ බැංකුවද 2026 සැප්තැම්බර් මාසය අවසන් වනවිට රැකියා 3,500ක් කප්පාදු කිරීමේ සැලැස්මක් මීට පෙර ප්‍රකාශයට පත්කර තිබූ අතර, Commonwealth Bank ඇතුළු තවත් බැංකු කිහිපයක් ද සේවක සංඛ්‍යාව අඩු කිරීමට පියවර ගෙන තිබෙනවා.

ඔස්ට්‍රේලියාවේ රැකියා කප්පාදු කරන අතරතුර ඇතැම් බැංකු ඉන්දියාව, පිලිපීනය සහ වියට්නාමය වැනි රටවල තම සේවක සංඛ්‍යාව ඉහළ නැංවීමට සැලසුම් කර තිබීම ද විශේෂත්වයක්.

කෙසේ වෙතත්, Westpac බැංකුව අවධාරණය කරන්නේ මෙම රැකියා කප්පාදුව AI තාක්ෂණය හඳුන්වාදීම නිසා සිදුකරන්නක් නොවන අතර, ව්‍යාපාරික
අවශ්‍යතා සහ මෙහෙයුම් ප්‍රතිව්‍යුහගත කිරීමේ ක්‍රියාවලියක ප්‍රතිඵලයක් බවයි.

එහෙත් බැංකු ක්ෂේත්‍රයේ AI සහ ස්වයංක්‍රීය තාක්ෂණය භාවිතය ඉහළ යාම සේවක රැකියා සුරක්ෂිතභාවයට තර්ජනයක් විය හැකි බවයි ඔස්ට්‍රේලියානු මූල්‍ය සේවක වෘත්තීය සමිතිය පෙන්වා දෙන්නේ.