ඔස්ට්‍රේලියාවේ Professor Georgina Longගේ නායකත්වයෙන් සිදුකළ ලෝක මට්ටමේ සායනික පරීක්ෂණයකින්, චර්ම පිළිකා වර්ගයක් වන Melanoma නැවත ඇතිවීම හෝ රෝගියා මියයාමේ අවදානම 42%කින් අඩු කළ හැකි නව පුද්ගලිකරණය කළ පිළිකා එන්නතක් පිළිබඳ වැදගත් ප්‍රතිඵල හෙළි වී තිබෙනවා

Intismeran ලෙස හැඳින්වෙන මෙම ප්‍රතිකාර එන්නත mRNA තාක්ෂණය මත නිර්මාණය කර ඇති අතර, සෑම රෝගියෙකුගේම පිළිකා ගැටිත්තේ ඇති විශේෂ ජානමය වෙනස්කම් හඳුනාගෙන, එම රෝගියාටම ගැළපෙන ලෙස වෙන වෙනම සකස් කිරීම එහි විශේෂත්වයයි.

මෙය සාමාන්‍ය රෝග වළක්වන එන්නතක් නොව, පිළිකාව ශල්‍යකර්මයකින් ඉවත් කිරීමෙන් පසු එය නැවත ඇතිවීමේ අවදානම අඩු කිරීම සඳහා ලබාදෙන ප්‍රතිකාර එන්නතක් බව පර්යේෂකයන් පවසනවා.

මෙම පරීක්ෂණයට, ශල්‍යකර්මයක් මගින් Melanoma පිළිකාව ඉවත් කර තිබුණද, එය නැවත ඇතිවීමේ වැඩි අවදානමක් තිබූ රෝගීන් 1,137 දෙනෙකු සහභාගී කරගෙන තිබෙනවා.

එම රෝගීන් කණ්ඩායම් දෙකකට බෙදා පරීක්ෂණය සිදුකර ඇති අතර, එක් කණ්ඩායමකට නව Intismeran එන්නත සහ දැනට භාවිත වන Keytruda පිළිකා ප්‍රතිකාරය ද අනෙක් කණ්ඩායමට Keytruda ප්‍රතිකාරය පමණක් ද ලබාදී තිබෙනවා.

වසර දෙකකට පසු ප්‍රතිඵල සසඳා බැලූ විට, Intismeran සහ Keytruda දෙකම ලබාගත් රෝගීන්ගෙන් 82.2%කට පිළිකාව නැවත ඇති නොවී තිබූ අතර, Keytruda පමණක් ලබාගත් රෝගීන් අතර එම ප්‍රතිශතය 70%ක් ලෙස වාර්තා වී තිබෙනවා.

එමෙන්ම මෙම නව ප්‍රතිකාරය, පිළිකාව ශරීරයේ වෙනත් ප්‍රදේශවලට පැතිරීම හෝ මරණයට පත්වීමේ අවදානම ද 38%කින් අඩු කළ බව සායනික පරීක්ෂණ ප්‍රතිඵල පෙන්වා දෙනවා

Professor Georgina Long පවසන්නේ මෙම සොයාගැනීම Melanoma ප්‍රතිකාරයට පමණක් නොව, අනාගතයේ වෙනත් පිළිකා වර්ග සඳහාද එක් එක් රෝගියාට ගැළපෙන පුද්ගලිකරණය කළ ප්‍රතිකාර නිර්මාණය කිරීමට නව මාවතක් විවෘත කළ හැකි බවයි.

කෙසේවෙතත්, මෙම ප්‍රතිකාරය තවමත් පරීක්ෂණ මට්ටමේ පවතින අතර, සාමාන්‍ය රෝගීන් සඳහා භාවිතයට ගැනීමට පෙර අදාළ නියාමන අනුමැතිය ලබාගත යුතු වනවා.

මූලාශ්‍රය: Cancer Network